Dimapur Police-i Niuland nung atalokba jangjatsür

Dimapur, July 29, 2024 (TYO): Dimapur Police-i July 25, 2024 aonung Niuland district nung police gari kati Ngukavi Yeptho menüngsetba tatalokba indang osang jangjatsüogo.

July 22, 2024 aonung Showuba yimtsüng kübok four lane highway nung mejangjatetba nisung pezüi

nisung ana pur ao, teka sangshi aser auyazüka bener ao ta July 25 nü Women Police Station, Dimapur nung FIR ka benoka liasü ta Dy. Commissioner of Police (Crime)/ PRO, Dimapuri sangdong ka nung ashi.

Nisung pezüji Scorpio gari temesüng ka nung liasü aser parnoki pua anir orr teka sangshir nisung ana rongnung tetsür ka liasü. Iba jagi Women P.S. nung BNS Act kübok ken o ka benok aser bushisüngdang tenzük. Police-i asüngdangya asüdang nisung pezü jagi tena tashiyim agi apu aser tenük nembanger memetetba tesem kati anir ao.

Idakji tena ket nung aliba sen aser osettem auyaba den tena indang bank accounts nung yua aliba sen

tashiyim agi Gpay ajanga meshizük ta tenati ashi.

Iba mapang tetsürla dak teka sangshi aser tim masüba mapa inyakba osang ashi. Manen, nisung pezü jagi tena süoshi semzükdaktsü aser police dang mashitsü amokmerena noksa o video tem agi.

Item osang nung ajemdaker police-i bushisüngdanga arudang aser digital footprints bendenba sülen temulung melemi bilemertem aputsü atema miima bushiteptsü tenzük. Temulung melemi bilemer ka Niuland district kübok Tokugha yimtsüng nung lir ta lazükba sülen July 25, 2024 aonung police telok ka iba yimtsüngi yok.

Iba mapang police telok jagi temulung melemi bilemer Ngukavi Yeptho motorbike ka nung mener jena aoba angu. Police telokji nija gari ka nung mener liasü aser parnoki pa dang parnok police ta shia anentsü ashi saka pai tashi manga jena aodang motorbike ji ajutoker lao, ta Dimapur Police-i ashi.

Pa ali nung laoa lia police mena aliba gariji khen nung manenteti tyre külen agi motorbike aser Ngukavi dak menüng aser garijia lenmang achijilen tsükok ta parnokisa ashi.

Iba lendong atalokli police-i Ngukavi Referral Hospital-i anir ao saka pa asü. Ozüng agi melaba ama teinyaktsü ajak inyaker District hospital Dimapur nung Post Mortem atema mang bener ao aser police-i arshiba dak sendakba nung Niuland Police Station nung ken o ka benoka lir, ta Dimapur Police-isa ashi.

Iba ken o timi bushisüngdanga aotsü atema iba tatalokba nung shilem agir police ajak mapa nungi anenja lir ta Dy. Commissioner of Police (Crime)/ PRO-isa metetdaktsü.