Dimapur Police-i ozüng alema inyakertem apu

Dimapur, Luroi/August 20 (TYO): Luroi/August 18, 2018 anepdang 02:15 ako meta V/o Kiyevi, PS Chumukedima, Dimapur nungi nisung ka tenüng agi, Niuto Awomi-i 4th Mile Agri Expro anasa aliba ATM Booth ka nungi sen auyatsü merangdang public-i pa apu, aser iba dak sendakba nung ATM Cash Vault lapoktsü atema amshiba crow bar ka apu aser Diphupar Police Station nung ken o ka benoka bushisüngdangdar, ta Addl. Dy. Commissioner of Police/PRO, Dimapur, Nagaland-i sangdong ka nung metetdaktsü.
Ano tanga tatalokba ka nung, Borpathar Police Station nung benoka aliba ken o ka dak sendakba nung Luroi/August 17, 2018 nü Dimapur police-i tetsür ka kümzükogo aser tai tonglokja alisang, Bijoy Deka, Purana Bazar Dimapur nung apu; tesülen kümzüka alila aser tai tonglokja alisang naprongji Borpathar Police ket nung agutsüogo, ta kasa sangdong nung shia lir.
Maneni Luroi/August 13, 2018 nü Dimapur police-i shishilembartem dang nungi sen akhangba atema nisung ana- V/o Kuhoxu Ps/Po Niuland, P/A Half Nagarjan nungi Nitoho Kinimi, aser V/o Roni Ps/Po Bhandari, P/Add Signal Bazar nungi Tokato Jimumi na apu; tena ket nungi vehicles tax information slip 32, note pad ka, NNC-NON Accord visiting card ka aser sen 750/- apu; iba dak sendakba nung East Police Station Dimapur nung ken o ka benokogo aser maneni bushisüngdangdar, ta Addl. Dy. Commissioner of Police/PRO, Dimapur, Nagaland-isa metetdaktsü.