Dimapur Police-i ozüng nung aibelenertem apu

Dimapur, Chiteni/July 03 (TYO): Dimapur nung tang teyangludak aliba Lotha Church tesem nung ozüng alema sen sarur ka Dimapur Police-i Aami/June 25, 2018 nü apu. Iba nisungba ya arishi küm 26 tain, NNC Non-Accordist nung SS Secy Tovi Yeptho ta jangjaogo. Pa ket nungi NNC Non-Accordist indang assignment order copy ka, GPRN Secretarial Tatar Hoho Parliamentary temzüng aser shishilembartem tenüng kar bena aliba nguteta West Police Station nung ken o züluokogo, ta Additional Deputy Commissioner of Police/PRO, Dimapur, Nagaland ajanga sangdong ka nung metetdaktsü.
Maneni Aami/June 30, 2018 nü Dimapur Police ajanga Ghorapati area nung ozüng alema sen sarur Inato Chophy (arishi küm 26) Po/Ps Aghunato apu. Pa ket nungi sen 11,500 ngutet aser iba dak sendakba ken o ka East Police Station nung züluokogo, ta kasa sangdong nung shia lir.
Chiteni/July 02, 2018 nü Purana Bazar nung aliba petrol pump ka nung Dimapur Police ajanga arishi küm 36 tain, Husuka Achumi, NNC (N/A) apu. Pa ket nungi ozüng alema sen saruba slip (extortion slip) ka den sen 10,000 ngutet. Iba maparen dak sendakba nung ken o ka East Police Station nung züluokogo.
Tang tesüsa parnok asem apuba ya dena Aenjeti/January nungi Aami/June 2018 tsüngta Dimapur Law Enforcement Agency ajanga nisung 107 puogo aser police station balala nung ozüng alema sen saruba ken o 70 züluokogo. Kasa mapang item nisungtem kabu nungi sen 10,22,457, prangbong 10 den injang tabu balala tejang 183 ngutetogo, aser item apuba oset ajak judicial custody dangi yokogo, ta Additional Deputy Commissioner of Police/PRO, Dimapur ajangasa metetdaktsü.
Iba dak alaka Aami/June 26, 2018 nü Mapao Khulen, Senapati kinungtsü, Lokho Adaphro-i ozüng alema heroin gram 14 bena aliba yong Dimapur Police temi Blue Hill line area nung la apu. Iba dak sendakba nung ken o ka Women PS nung züluoka bushisüngdang südagi.
Maneni LRC Colony, Dimapur nung alir arishi küm 27 tain, Atoka-i ozüng alema temesepba yi (IMFL) case 44 shibelenba ajanga Chiteni/July 01, 2018 nü Dimapur Police-i pa Old Over Bridge (Burma Camp area) nung puogo. Iba dak sendakba nung ken o ka East Police Station nung züluoka bushisüngdang südagi, ta kasa sangdong nungsa shia lir.