Dimapur police-i ozüng nung aibelenertem apu

Dimapur, Aenjeti/Jan. 23 (TYO): Addl. Dy. Commissioner of Police/PRO Dimapur, Nagaland-i sangdong NO.CP/DMR/ESSTT-63/2019-20/ ajanga ashiba agi, 16/01/19 anogo Dimapur Police-i Khatkhati Opp CRPF Camp Assam nung alir Montu Borah’er jabaso Ravi Borah Burma Camp, Dimapur nung apu aser pa ket nungi Spasmo Proxyvon capsule tejang 2800 ngutet. Iba ken o ya East Police Station Dimapur nung züluoker bushisüngdang südagi.
Dimapur Police-isa 17.01.2019 nü Burma Camp Dimapur nungi arishi küm 37 tain Hekuto apu. Pa ya iba tesem nung mobile hand set ka den sen 5000 rakzüktsü merangba mapang pua liasü. Iba ken o ya East Police Station Dimapur nung züluoka bushisüngdangba mapang lir, ta kasa sangdong ajanga ashi.
Maneni 19.01.2019 nü Dimapur Police-i nisung ka Town Hall Dimapur anasa Super market nung tashiyim agi mobile phone aser sen 3000 rakzükba mechi apu. Pua alisang ya Super Market, Dimapur nung alir Akaho Ayemi ta jangjaogo, aser iba maparen dak sendakba ken o ya East Police Station Dimapur nung züluoka bushisüngdang südagi.
19.01.19 anogosa Dimapur Police-i nisung ka Central Jail Junction nung jakdaka gari auyaa lia apu. Iba nisungba ya Alaphu, Zunheboto nungi Hevikhe’er jabaso arishi küm 35 tain aser tang 4th Mile Agri Expo nung telidak Tokugha Chophy ta jangjaogo. Pa apuba sülen police temi Government registered Mahindra Bolero ka Zunheboto district nungi ngutet, koba kasa 4th Mile tesem nungi 12.01.19 nung auyaba liasü. Iba maparen nung ken o ka Diphupar Police Station nung züluoka bushisüngdang südagi.
Maneni osang kar nung ajemdaker Dimapur Police-i 21/01/19 anogo Old Railway Gate, Below Fly Over Bridge Dimapur nung aliba Hotel ka nungi nisung asem, Khon Khiamnungan (32), Sukhiam Khiamungan (22) aser Mono Khiamnungan (22) apu aser parnok ket nungi .22 pistol ka den magazine ka aser injang pongu, .32 pistol ka den magazine ka aser injang ana ngutet. Iba dak sendakba ken o ka East Police Station nung benoka bushisüngdang südagi, ta Addl. Dy. Commissioner of Police/PRO Dimapur ajangasa metetdaktsü.