Dimapur police-i SBI main branch Dimapur nungi sen auyar tongti puogo

Dimapur, Yimpoksüi/November 01 (TYO): Taküm Chiteni/July 19 nü sen lakh 80 samaba/auyaba ken o nung Dimapur police-i tongti asalentongsang Mongputeni/October 28, 2018 nü West Bengal nung Howrah railway station nungi puogo, ajisüaka tang tashi nungbo senji mangu, ta osang ka ajanga metetdaktsü.
Taküm Chiteni/July 19 nü private security firm ka nungi security agent temi ATMs nung sen inoktsü atema sen bener aoba mapang nung State Bank of India (main branch, Dimapur) kima senji sama.
Iba ken o nung tai tonglokja alir tongtiji arishi küm 60, G S Mudaliyar lir, ta jangjaogo, aser pa ya Tamil Nadu nung amenoka aliba inter-state telok ka nung züngsem lir.
Dimapur police aser Howrah police na senteper pa puogo, ta Commissioner of Police, Dimapur, Limasunep Jamir (IPS)-i metetdaktsü.
Par telok inyakyimji- banks aser tanga financial institutions nungi sen bener aoertem meinprongdakja parnoki minute ishika tsüngda senji auyazüka bener ajener.
Iba ken o nung züngsem 11 densema lir, aser maneni tangartemjia aputsü atema maneni bushisüngdangdar, ta police ketdangserisa metetdaktsü.
Tamasabo iba ken o nung police-i tsüngsü kecha mepui liasü, ajisüaka Dimapur police ketdangsertemi kanga meranga inyakba den technical surveillance inyakyim amshia tai tonglokja alirji puogo, ta Commissioner-isa shisem.
Commissioner-i ashiba agi, bank aser private security agency jagi inyakyim shidak mebenshi.
Iba dak sendakba nung pai, tarutsü nungbo item amaji mataloktsü atema khuret bena inyaktsü nüngdaker, ta ashi.
Benjung mongpu atonger anungji takoksa mangutsü atema sensotem kanga kümküma alitsüla, ta Dimapur police-isa metetdaktsüogo.