Dimapur police-i sen sarur ana apu

Dimapur, Monupii/May 26 (TYO): Monupii/May 26, 2018 anepdang züngia 3:00 ako meta Special Operation Team (SOT), Dimapur Police-i Hiphan yim nungi asür, Yanpok Konyak’er jabaso arishi küm 20 tain, Lapu Konyak @ Albert Konyak-i (tang Purana Bazar Dimapur nung telidak) New Field Check gate nung lisem abenba truck anirtem dang ozüng alema sen saruba atema apu, ta tanü Addl. Dy. Commissioner of Police/PRO, Dimapur, Nagaland-i sangdong ka ajanga metetdaktsü.
Pa ket nungi sen 10,000 (meyirjang ter) bena aliba apu.
Ano osang ka angazükba nung ajemdaker Monupii/May 26, 2018 anepdang 5:00 ako meta Special Operation Team (SOT)-i Yehemi yim nungi Khuvihe Aye’er jabaso arishi küm 26 tain, Khetoka Aye (tang Middle Colony, Purana Bazar, Dimapur nung telidak)-i Dellai Check gate area nung truck anirtem dang nungi ozüng alema saru saruba atema apu.
Pa ket nungi sen 15,810 (meyirjang terpongu ser noklang ti) apu, ta kasa sangdong nung shia lir.
Tena anema West Police Station Dimapur nung ken o benokogo aser maneni bushisüngdangdar, ta kasa sangdong ajanga metetdaktsü.