Dimapur Police-i shishilembartem den senden ka amen

Dimapur, May 7 (TYO) : Deputy Commissioner of Police, Zone-I, Vilhousie Peseyie lenisüba kübok Dimapur Police-i May 7, 2017 nü Dimapur nung shishilembartem den sensaksemba senden ka amen.
Iba senden ya Commissioner of Police indang office nung ayongzüka agi aser Dimapur Chambers of Commerce and Industries, Chumukedima Chamber of Commerce, East Dimapur Business Association, Business Association of Nagaland, Nagaland Medicine Dealers Association, Hazi Park Market Association aser tanga Associations aser entrepreneurs aika aden.
Dimapur Police nungia ADCP/ACP aser tanga field Officers den Police Station ajak nungi Officer in Charge tem iba senden nung aden.
Shishilembartemi timtem ajuruba onüktem benoka lemsateptsü aser item khuret asoshi police-i parnok teinyaktsü akangshitsü nükjidong nung senden ya ayongzüka amen ta ADCP/ PRO, Dimapur Police-i sangdong ka nung metetdaktsü.
Senden nung shishilembartemi parnok dak tashiyim agi sen saruba indang khuret lemsatep. Forum for Naga Reconciliation (FNR)-i Naga nunger putepshitsü atema inyakba mapa pusema nungiter saka iba ya ajanga Naga Yimten Teloktemi pei tuluba ta kuli agütsütepa sarutem sarutsü tenzük. Iba inyakyim azüoktsü atema katika dang tai tongloktsütepba anener ajak külemi inyaktsüla ta senden nung banegjemtep.
Taküm küm tenzüker tang tashi nung Dimapur district nung tashiyim agi sen saruba ken o 31 police tsüngdang benok aser item ken o nung nisung 37 dak tain tonglokja apu. Ajisüaka, shishilembartemi takhangba agütsüba nung ajemdaker Crime Helpline tenzük saka ibaji mapa küma mamshir, ta Dimapur Police-i senden nung metetdaktsü.
Tashiyim agi sen saruba anema ozüng takang yanglua maliba ajanga aibelenertem mapang tatsüka tsüngda bail nung chioktsüsa akümer, aser iba atema shishilembartemi ken o benoktsü tezü atanger. Anungji iba dak sendakba nung ozüng takang yanglutsüla ta tanü senden nungsa lemsatep.
Dimapur Police crime helpline numbers:  7085055048, 7085055049 & 7085055043.