Dimapur Police-i SIT bushisüngdang atema jangjashitsür

Dimapur, October 2 (TYO): Ozüng alema totzü meyoktepba ken o atema Co-ordination Committee of Civil Society Organization on Fuel Adulteration-i tai tongloktsüba asoshi Dimapur Police-i SIT bushisüngdangba dak sendakba nung onük kar jangjashitsüogo.
June 27, 2016 nü ACAUT (Against Corruption and Unabated Taxation), Nagaland züngsemtemi District Administration aser Police dang tesem trok nung ozüng alema totzü meyokteper ta osang sangoktsü. Iba nung ajemdaker tesemtem mita aodang tesemtem nung Hydro Carbons aika angu aser ibaji totzü nung meyokteptsü atema ozüng alema rizünga ayuba liasü, ta Addl. Dy Commissioner of Police/PRO, Dimapur-i sangdong ka nung metetdaktsü.
Jungjunga bushisüngdangtsü atema Hydro Carbons aser totzü meyoktepba tesemtem shibangtsü aser osang agütsüba ama West Police Station aser Diphupar Police Station nung ken o ka ka benok, ta Dimapur Police -isa metetdaktsü.
Parnokisa ashiba agi, July 2, 2016 nü bushisüngdangertemi Hydro Carbons tendangtsü atema tesemtem semdangi ao saka tesem ana nung seal raksar liasü aser Hydro Carbons kar miima agiener aliba angu. Iba asoshi, West Police Station nung ken o tanga ka benok aser iba dak sendakba nung nisung 5 apu.
Ano külen, hydrocarbons apuba osang indang kuli züluokdang, ketdangsertemi jungjunga mereprang aser tankers telung nung kwi liasüar metendangi teka agi dang tanker nung akodanger züluoka ayu. Iba asoshi mapa aibelena inyakba ketdangser anema departmental enquiry ka tenzükogo. Maneni, shibangtsüba tesemtem anüktsü asoshi mapa lemzüktsüba police tema mapa shitak meinyakba atema ken o benoka lir. Ajisüaka, item tatalokba ajanga bushisüngdangba maparen nung timtem balaka magütsür aser hydrocarbons tera miima bener aobaji angutsü imlar, ta sangdong nungsa metetdaktsü.
Diphupar Police Station nung ken o benoka aliba dak sendakba nung apuba osang tejangja agüja maliasü aser iba jagi Court nungi temelaba agia aser Magistrate ka lia ozüngi melaba ama tanaben reprang aser tanker tazüng 8 chiokbaji okadak tetuyuba kübok inyak, ta Dimapur Police-isa jangjashitsü.
SIT-i Public Prosecutor office ajanga anogo balala nung tai tonglokja alirtem nem anticipatory bails magütsütsü atema petitions 6 tashi agütsü. Ajisüaka, iba asoshi telemtetbaji Court dak dang tashi lir aser Court-i bail temelaba magien tashi parnok tanaben aputsü makok. Shibangja aliba tesemtem nungi bendenba sample 73 tashi Forensic Science Labs nung tendangtsü atema bener yokogo aser kar indang osang nguogo.
SIT-i bushisüngdanga arudang, tesemtem nung anguba SK Oil ji state kübok aliba agency balala den sendaktepba bushitetogo aser maneni bushisüngdang südar, ta Dimapur Police-isa ashi.
Ano, totzü meyoktepdang amshiba solvents ji state nung aser tangalen aliba Petro chemical firms tsüngsü bushiteta ogo aser maneni bushisüngdang südar. Tang tashi nung iba ken o atema SIT-i nisung 16 puogo aser parnok dang asüngdangya südar.
Public taginüba ama SIT-i bushisüngdanger aser ochi obendang agütsütsü teimla lir. Anungji, iba ken o tembanga mebushi tashi nisungtemi amalitepa yariteptsü aser o kuli maliba o mejembitsü mepishir, ta Addl. Dy Commissioner of Police/PRO, Dimapur-isa metetdaktsü.