Dimapur Police-i tatalokba balala nung nisung 10 apu

Dimapur, April 30 (TYO) : Dimapur Police nung Zone-II kübok Anti Extortion Team-i Litami Old village nungi Heshito Yepthomi ta ser nisung ka apu.
Pa ya GPRN/NSCN nung ‘leacy’ ka ama inyaker ta angazüker aser pai Gorapatti area, Dimapur nung shishilembartem dang nungi tashiyim agi sen saruba atema aija apu, ta Addl. Dy Commissioner of Police/PRO, Dimapur-i sangdong ka nung metetdaktsü.
Ano, April 29, 2016 nü Dimapur Police nung Zone-I kübok Anti Extortion Team-i Salman Laskar ta ser nisung ka apu.
Pa ya asür Ali Laskar’er jabasa ta jangjaogo aser pai New Market nung ango ayokdak GPRN/NSCN tenüng nung sen saruya lia apu, ta sangdong nungsa shia lir.
Pa ket nungi sen aser taitsü aketba kulikakettem kar nguteta lir, ta Dimapur police-isa metetdaktsü.
April 30, 2016 nü GRPS nung Dimapur Police-i train nung senzüsenbongertem dang nungi rakzükraktemer nisung 5 apu.
Nisung kari aonung menur aruba train passenger tem dang nungi rakzükraktemer ta ken o tem benokba nung ajemdaker police-i Roshan Kumar; Bikash Harijan; Vishal Harijan; Babu Khan aser Shambu Saha nungertem apu.
Ano, tanü GRPS nung Dimapur Police-isa ozüngi noktangba mozütem shibelener ka apu. Paji asür Om Prasad’er jabaso Nitish Kumar ta jangjaogo aser pa ket nungi Spasmo Proxyvon süngjang 10,000 aser Nitrosen süngjang 2,500 bena aliba apu.
Tanü Dimapur Police nung Zone-I kübok Anti Extortion Team-i tashiyim agi sen sarur nisung ana apu. Khermahal area nung aliba tata parking anasa nisung ana jagi GPRN/NSCN tenüng nung tashiyim agi sen saruba atema apu.
Tenaji Yezhuvi’er jabaso Tokaho Chopy aser Zhekhuvi’er jabaso Chinaho ta jangjaogo. Tena ket nungi tashiyim agi sen meshiba shiditem aser tanga taitsü aketba kulikakettem ngutetogo, ta Dimapur sangdong nungsa metetdaktsü.