Dimapur Police-i Wb. Imlilepden puer aoertem puogo

Dimapur, Tsüklai (February) 03, 2018 (TYO): 2017 küm Luchii (December) ita 3 aonung sorkar ketdangser Wb. Imlilepden Pongener, DAN Secretary dang nungi auyaba aser kangshia puer aoba atema East Police Station, Dimapur nung FIR ka benoka liasü, iba sülen asüngdangyaba mapang nung, iba aonungji 8:30 ako meta mejangjaba nisung asem Super Market Complex, Dimapur sülen aliba Imlilepden’er ki telungi kangshia aitba sülen par asem jagi, kinüngtsü tenati phone magizükba atema aser parnoki akhangba sen magutsüba atema tena amokmerena liasü ta metet, ta tanü Addl. Dy. Commissioner of Police/PRO, Dimapur, Nagaland-i sangdong ka ajanga metetdaktsü.
Iba sülen nisung tamajungertem jagi par kibong ket nung sen 1,17,000, mobile handsets pongu aser pa indang official Govt. gari sabi auya, iba sülen pa tenük nembangtsü aser kangshia pa indang nija gari nung mendaktsür par kidang nungi puer ao, ta sangdong nungsa shia lir.
Iba sülen pa Naharbari tesem (Dhansiri ayongküm) nung mejangjaba tesem kati anir orr pa dak teka sangshi aser pa teka alener pa kija gari nung aonung piyong toktsü; tasüngnepji 5:30 ako meta iba tesem nung alir kari gariji ngua pa kümzük, ta sangdong nungsa shia lir.
Item tatalokba sülen nungjagi nisung asemji bushi tenzük, aser tesüsa taküm Aenjeti (January) 17 nü Dimapur Police-i par asem rongnung ka- 4th Mile, Dimapur nung alir aser PO/PS- Niuland kübok Kikheyi yimer, Ghoheto Achumi’er jabaso, arishi küm 27, Aboto Achumi apu; tai tonglokja alisang, Aboto Achumi (S/S S.O. Civil Wing NSCN-R) jagi auyaba aser nisung apubaji nangzükogo, ta Addl. Dy. Commissioner of Police/PRO, Dimapur, Nagaland-isa metetdaktsü.
Ano Aenjeti 20, 2018 nü Bamanpukhuri Village, Dimapur nung alir aser Ghukiye yimer, Ghovito L. Chishi’er jabaso, arishi küm Kenneth G. Chishi (S/S Dy. Secy. Civil Wing Of NSCN (R)) apu. Pua alisang Kenneth G Chishi ya tamalen Anti-Corruption and Crime Investigation Front nung State Secy. ka liasü, ta kasa sangdong ajangasa metetdaktsü.