Dimapur Police-i yi bottle 19000 apu

Dimapur, July 22 (TYO) : Taoba hopta ana shi tsüngda Dimapur police-i NLTP Act kübok ken o 25 züluokogo aser nisung 27 tashi apu.
Tatalokba balala nung police-i sen lakh aika jenjangji yi temeyoktep bottle 19000 (case 1600) jungnüa apu, ta Addl. Dy. Commissioner of Police/PRO, Dimapur-i sangdong ka nung metetdaktsü.
July 19, 2016 nü East Police Station nungi police temi yi case 1195 tashi apuba sülen July 20 nü Diphupar Police station nungi police temia yi case 140 apu.
Yiji Mahindra Scorpio (NL-06 2641) gari ka nung bener oya lia police-i gari arshia aoba sülen apu. Iba dak sendakba nung Hovikhu Assumi’er jabaso Khetoka Assumi apu, ta Dimapur Police sangdong nungsa shia lir.
Ano, July 21, 2016 nü Women Cell-ia Zeliangrong Colony, Dhobinala nung tesem ka mita aodang yi case 22 apu aser iba dak sendakba nung nisung ka pua lir.
July 20, 2016 nü Dimapur Police Zone-I kübok Anti Extortion Team (AET)-i Blue Hill tesem nungi nisung ana apu aser tena ket nungi .22 pistol ka ngutet.
Tenaji Burma Camp, Dimapur nung alir Omega Awomi aser Habibur Rahman na ta jangjogo aser iba dak sendakba nung East Police Station nung ken o ka benoker bushisüngdang südar, ta sangdong nungsa metetdaktsü.
Kasa anogo nungsa, Dimapur Police Zone-II nungi Anti Extortion Team (AET)-i Tokiho Chishi ta ser nisung ka apu.
New Market nung iba nisung yagi ango ayokertem dang nungi tashiyim agi sen saruba atema apu aser iba dak sendakba nung ken o ka benoker buushisüngdang südar, ta Addl. Dy. Commissioner of Police/PRO, Dimapur sangdong nung shia lir.