Dimapur Police indang website sayaogo

Dimapur, November 24 (TYO) : November 24, 2015 nü Commissioner of Police, Dimapur office nung Director General of Police, Nagaland, L.L. Doungel, IPS-i Dimapur Police indang website sayatsüogo.

Sentong nung L.L. Doungel, IPS-i website lapokba atema unit aser ketdangser nem tenüngsang agütsü aser iba ya ajanga police-i tensa melenshiba den tsüngsü medema anidakba sayur, kechiyong tanü information & technology kanga tongtipang kümogo ta pai ashi.

Sentong nung Commissioner of Police, Liremo Tsopoe Lotha-i public aser police tsüngda tesentaktep nüngdakba indang onük jembi.

Iba nükjidong nung website lapoker aser iba yagi sensotem dang osangtsüsang metetpelatsü aser teyari agütsütsü, ta paisa shisem.

Dimapur police-i nübortem tesentaktep alitsü nükjidong nung twitter account aser facebook page lapok aser nübortemi kanga pela agizük. Tang website lapokba ajanga Dimapur Police nem digital information tsütsü tajangzük tulu bener arutsütsü aser iba atema website purapiteta yanglur Kilemtoshi, NPS, ACP (SB) nem tenüngsang agütsür, ta Liremo Lotha-isa metetdaktsü.

Sentong nungsa Kilemtoshi, ACP (SB)-i website indang temetettsü indang lemsatep. Iba website nung Dimapur Police indang temetettsü, zones & divisions indang map, Police Stations & Traffic Control indang profiles & google maps location aser Officers indang Directory nungertem lir.

Iba dak sendakba osang tali metetnürtemi www.dimapurpolice.in nung angutsü, ta Addl. Dy. Commissioner of Police/PRO Dimapur-i sangdong ka nung metetdaktsü.