Dimapur Police osang

Dimapur, January 25 (TYO) : Taoba hopta ana tsüngda Dimapur Police-i tashiyim agi sen sarur aser ozüng alema prangpong-injang bener senzür nisung ana apu.

January 15, 2016 nü Blue Hill area, Dimapur nung B/11 NAP(IR) patrol section-i Atoka Achumi apu. Atoka ya NSCN(R) nung ‘Sgt Major’ ta angazüker aser pai iba temeket nung tashiyim agi sen saruya lia apu aser pa ket nung .32 pistol ka den injang 5 bena liasü.

Ano, January 18 nü Rail Bazaar nung C/13 NAP(IR) patrol section-i Temsuliba Jamir apu. Pa ya GPRN/NSCN nung ‘Major’ ta angazüker aser pa ket nung .22 pistol ka den injang round ka bena aliba atema apu, ta Addl. Dy Commissioner of Police/PRO, Dimapur-i sangdong ka nung metetdaktsü.

January 23 nü Dimapur Railway Station nung Morigaon District, Assam nungi Abdul Mistri’er jabaso Babul Ali apu. Pa ket nung Ativan (sedative) süngjang 65 bena lia apu aser pa dang asüngdangya asüdang, pai mozüji chiyungtsü aser tajemtzü nung meyokteper train nung senzür nem chiajemdaktsüba sülen auyaba nangzükogo. Iba dak sendakba nung bushisüngdang maneni südar,

January 17 nü Assam nungi auyaba Toyota Innova gari ka January 21 nü Dimapur Police-i ngutet. Iba gari ya Town area nung senzüa lia police-i rüshi aser police-i gari auyartemji aputsü atema gari sülen anidakba lazüka parnok jena ao. Mapang tatsüka lir külen gariji lenmang nung yuja aliba angu. Iba gari samaba ken o ji Dibrugarh Police nung benoka lir aser iba jagi gariji parnok ket nung agütsüogo.

January 23 nü Dimapur Police-i Toyota Etios gari kibur Monaranjan Kalita den Karan Das aser Netash Majumdar nunger apu.

Parnok ajak ya Dibrugarh, Assam nung alir aser parnoki gariji miimba yokdoktsü atema mapa inyakya lia police-i apu. Gariji first party Insurance den Bank Finance ajanga aliba liasü parnoki gariji miima yokdokba sülen Police tsüngdang gari samaba ken o ka benoktsüba liasü.

January 24 nü Thoubal District, Manipur nungi Abdul Wahat’er jabaso Jalaluddin-i motorcycle ka auyatsü merangdang police-i apu. Pa ket nung motorcycle sabi 28 sets bena liasü aser pa ya gari auyar mongin ka asütsü amai temulung melemi bilemer. Iba dak sendakba ken o ya maneni bushisüngdang südar, ta Addl. Dy Commissioner of Police/PRO, Dimapur-isa sangdong nung metetdaktsü.

You must be logged in to post a comment Login