Tashiyim agi sen sarurtem apu; Motorcycle 3 nguteta lir
Dimapur, October 27 (TYO) : Dimapur Police kübok Women Cell-i küm ka ser ita asem lir külen samaba tanur ka ngutetogo.
August 2014 nung kinü tanurji ita asem alidang Dimapur Railway Platform nung sama aser iba dak sendakba nung police tsüngdang ken o ka benoker bushisüngdanga aru, ta Addl. Dy. Commissioner of Police/PRO Dimapur-i sangdong ka nung metetdaktsü.
Mapang talangka bushisüngdangba aser ano osang balala nungi angazükba nung ajemdaker October 20, 2015 nü Dimapur Police nungi teshimtet telok ka Hojai, Assam-i orr tanurji kümzük.
Iba dak sendakba nung nisung ana puogo aser tenaji Hojai nungi Abdul Kadir’er jabaso Noor Islam aser Hojai nungi asür Abdul Rashid’er jala Amina Khatoon na lir ta jangjaogo.
Tanurji Noor Islam-i auya aser sen meyirjang ana yong Amina Khatoon dang ayok. October 21, 2015 nü tanurji tsürabur chichiba ket nung agütsüogo, ta Dimapur police sangdong nung shia lir.
Ano, October 22 nü Women Cell-isa Jalukie nungi samaba tetsür ana angu aser October 25 nunga samar bushiba tetsür ka angu. Parnok ajakji tsürabur ket nung agütsüogo, ta sangdong nungsa metetdaktsü.
October 22, 2015 nü Kushiabill area nung truck garitem dang nungi tashiyim agi sen sarur ka police-i apu.
Iba nisung ya Kuhoboto nung Vitoshe’er jabaso Inavi Kinimi ta jangjaogo aser pa ya GPRN/NSCN nung ‘Rajapeyu’ lir.
Ano, October 23, 2015 nü Padum Pukhuri area nung nisung kari truck gari anishir ka pur ao aser truck kibur dang pa chioktsü atema sen meyirjang 10 meshir ta police-i osang angazük.
Osang angashiba sülen Zone-I kübok Dimapur Police-i bushisüngdangtsü tenzük aser Super Market area, Dimapur nungi truck anishirji kümzük.
Iba dak sendakba nung police-i nisung pungu den parnoki amshiba auto rickshaw densema puogo.
Police-i apurtemji, FGN(NA) nung Sgt. Maj. Akahino Awomi, FGN (NA) 2nd Lieut. Semato (John Yepthomi), Hito Zhimomi, Nighato Chophy aser Aboto Kiba nungertem lir, ta sangdong nungsa metetdaktsü.
Dimapur Police-i October 21, 2015 nü auyaba motorcycle 9 ngutetba osang sangdongba nung ajemdaker police-i maneni bushisüngdanga arudang Dimapur aser temeket nungi ano motocycle asem ngutetogo, ta sangdong nungsa shia lir.
Police-i anguba motocycle tem:
1 Yamaha R15 C/No. ME11CK016C2026478
Eng/No. Bluish
2 Yamaha R15 C/No. MU11CK041E2015894
Eng/No. Red/White
3 Yamaha Rx 100 C/No. 0565RH5031574
Eng/No. 5KH5031574 Black
You must be logged in to post a comment Login