Dimapur Railway station anasa alirtemi train lenmang nokdang

Dimapur, June 18 (TYO): Dimapur Railway station anasa alirtemi timtem kanga ajurur, ajisüaka  Dimapur Railway ketdangsertemi ibaji mesükshir ta shia Honibar anepdang parnoki tejashi nung longkak aita rail service tem nokdanga liasü.
Iba mapang nung mepetmesübo kecha matalok.
Railway station anasa alir nisung noklang ishika adenshia train lenmang nung ghonda ishika longkak ait, ajisüaka iba tensa azüokteta liasü. Tanü nikongdang 1:00 ako meta Dimapur tonga aruba train, Jan Satabdi Express dak alaka tanga train senzüba nung timtem maliasü. Mepetmesü madoktsü atema  sepaitem iba tesem jagi yoka liasü.
Tensa reprangshimtsü atema Parliamentary secy. NIDC, Tovihoto Ayemi-i iba tesem semdangba sülen idakji pai railway ketdangsertem den o lemtep.
Iba sülen pai longkak aitertem dang, anogo ana tsüngda railway ketdangsertemi kilentzü aodak tangbanga alibaji lapoktsütsü ta shiogo, ta metetdaktsü.
Iba telangzüba ngua longkak aitertemi longkak aitbaji anena liasü.
Railway, DMC aser tanga department balala nungi nisung aikati machinery amshia tangbanger aliba kilentzü aodak merüktettsü atema inyakdar, iba den külemi item tesemtem nung motzü atsünga aliba atsüteta indokdar.
Railway Station anasa aliba kiyong pongu- Railway Bazaar, Chatteswari Colony, Manipuri Upper & Lower Colony aser West Yard Colony nung aliba nüburtemi railway ketdangsertem dang railway lenmanglen kilentzü aodak tangbanga aliba lapoktsü aser merüktettsü atema takhangba agüja arur.
Tzünglu sashia aruba sülen tesüiba anogo ishika motzü atsüngba ajanga  kibong merirjang aika kongshiogo aser school o college kaketshirtema class nung medenteter.
Medical department aser DMC züngsemtemia item tesem semdanga DDT mozützü ainba den külemi menatepba tashitak mepoktettsü atema meratem agiogo.
Tesüiba anogo ishika iba maparen achaayanger DMC Administrator, Atokhe Aye-i, railway kübok kilentzü aliba tesemji Municipal jurisdiction kübok masü, ajisüaka municipal-i aayangertem aser DMC nungi machinery tem ajanga item tesemtem merüktettsü atema tajungtiba nung meranga inyaker, ta metetdaktsü.
SDO (C), Dimapur Albert Ezung-ia iba tesem semdanga liasü.