Dimapur Railway Station senzüka meyutsütsüla: K.G.Kenye

Kohima, Rongjui (September) 29 (TYO): Nagaland nungi Rajya Sabha MP, K.G. Kenye-i Northeast Frontier Railway (NFR) ketdangsertem dang Dimapur Railway Station tajungba kümdaktsütsü atema mapa inyaktsü shiogo.
September 28, 2018 nü NFR aser Lumding Division tesem nungi Members of Parliament senden amendang Kenye-i “Dimapur Station ajanga Nagaland aser Manipur state tem den Assam kübok tesem kar tenzüker, anungji senzüka meyutsütsüla” ta ashi.
Dimapur Railway Station nung tang nüngdakbatem maliba aser merükmeju maliba ya tangsa reprangtsüla, ta paisa ashi.
Tanü tashi kechiba Platform No.2 nung waiting shed meyanglur ta Kenye-i asüngdangdang “ali atsünga agiba ajanga iba mapa meinyakteter” ta NFR-i langzü.
Ali atsünga agiba khuret koktettsü aser tanga onüktem atema yariteptsü, anungji Division nung Chief Engineer-i PF No.2 nung nüngdakba Waiting Shed yanglutsü atema sentong renemtsüla, ta paisa ashi.
Kenye-isa passenger tem atema Rest Room ka yanglutsü aser kilem nung Solar Plant enoktsü atema takhangba agütsü.
Paisa, Dimapur (Dhansiri) nungi Zubza Railway project mapa inyakba osang asüngdang aser mapang lateta aliba ama tembanga inyaktsüla ta ashi.