Dimapur sannükertemi ‘Clean Election’ atema inyakertem dang pelar

Dimapur, Nov.29 (TYO) : Nagaland nung election timi merüka agitettsü asoshi bendanga agüja inyakertem Nagaland Baptist Church Council, Langpangkong Kaketshir Mungdang (LKM), Nagaland nung osangkaket yimozülurtem, Diezephe aser Aoyimti yimten sensosangertem ajak dang kanga pelar aser tenüngsang agütsür ta Dimapur Area Ao Baptist Pastors’ Fellowship (DAABPF) ajanga metetdaktsüogo.
” Nenoki inyakba mapatem ya kanga junger aser onokia nungiter, ” ta DAABPF-isa metetdaktsü.
Ano, Nagaland nung ochimashi tongpang nung tasü itta nokdaktsü asoshi Naga nungertem ajak ayongzüka taküm ajak bendanga agüja inyakba asoshi “Against Corruption and Unabated Taxation (ACAUT)” telok danga kanga pelar, ta sannükertemisa metetdaktsü.
Item teloktem yagi nüngsen aser nükenbelem arema Naga lima merüktettsü apusoba mapatem ajanga ano tanüngba Naga nungertem ajak ajungmesudaktsütsü aser Tsüngremi Nagaland nung election timi agitettsüsa yaritsü ta amanger ta Dimapur nung aliba sannükertem telongjemisa metetdaktsü.
Nagaland nung election merüka agitsü asoshi yongyaba mapa ya asangsang küma shitak inyaktettsüsa Naga nunger ajaki shilem agidaktsüner ta sannükertemi mepishia metetdaktsü.