Dimapur Senden Reju atema saru sarur

Dimapur, March 21 (TYO) : Dimapur nung Ao Senso Telongjem Dimapur tenüng nung Dimapur Aor Lanur Telongjemi anepalua Senden Reju tulubaka yangludagi. Iba ki tasazük ya metong nung ft 150 aser lenden nung ft 80 lir aser kilem tashi razüka lir.
Iba ki asüba nung tang tashi nung sen lakh 50 shi endokogo aser ano lakh 50 dak tali aotsü khuret anendaka alinungji, Dimapur nung alir Aor ajak kenü kisüdak amongba amai nisung shia kenü taa (one day wage) tenlatsü lemtetogo.
“Iba anogo ka taa saru ya Dimapur nung alir Aor süngpu nungi puti tashi ita sen agir, pensioner, business tapu balala inyaker aser ayanger tetsür tebur shia dang April 20, 2017 tashi nung ASTD kübok aliba tzükong aser yimtsüngtem ajanga sarur ASTD ket tongjang,” ta metetdaktsüogo. Ano, Dimapur nung telidak mesüaka ibaibo asenok inti meyong rongsen asünungji Aotsür Aor tesem balala nung alirtemia kenü taa tenla ya agütsüdaktsüner ta ASTD ajanga mepishia metetdaktsüogo.
Iba anogo ka taa saru agütsürtem tenüng ajak Senden Reju kima long tulu ka nung ajenloktsü aser iba long dangji ” Telongjem long ” ta ajatsü, anungji saru sarurtemi anogo ka taa tenla agütsürtem tenüng jungjunga ajener tezüluba (hard copy) den ano tenüngtemji CD mesüra pen drive nung (soft copy) enoker agütsütsü mepishir ta DALT lenirtemi metetdaktsüogo.
Iba ki ya taküm kümsa renemer külenbo lokti senden, kiyimba benjong aser kentenmenü aser saisapong sentong tulu idakji litettsü. Ano, tang yanglua akaba ariju yaa sentong tila asoshi amshitettsüsa AC enoka conference hall tajung ka yanglutsü ASTD sentong nung lir.
(ASTD sangdong tapak 11 nung angutsü)