Dimapur shishilembartemi sorkar nem mapang latettsür

Dimapur, Mongputeni (October) 15 (TYO): Dimapur ya tax sarudak tongti tesem ka kümogo aser iba ajanga shishilembartemi pei kibong memesütettsüsa timtemer, kechiyong tajangzük tera anguba nungi teimbaka tax balala agütsür.
Tax meshijen meshiba ya joko shishilembartemi maremzükteter. Talisa tax onsara saruba ajanga shishilembartem ya tenla agütsürtem ama akümtsü aser iba tensaji ajurura shishilembaba mapa tejakleni moutettsü aser anentsüsa akümtsü, ta Dimapur Chamber of Commerce & Industry (DCCI)-i metetdaktsü.
Tawa Dimapur Hardware Association-i hardware oset nung jenjang atuba aser talisa MS rod jenjang atutsüsa tensa ajurubaji public-i kechiba atu’ar meteta lir. Iba ya Dimapur Municipal Council (DMC)-i lease system tenzükba ajanga lir aser sorkar o public-i iba khuret ya angatettsüla, ta parnoki ashi.
Shishilembartem tenüng nung NGO temi ola adokba atema kanga pelar aser DMC, MAD aser Nagaland sorkari iba tebilemtsü süoki ia agizüktsü imlar, ta DCCI-isa ashi.
Nagaland state sorkari GST inyakyim agizüka inyaker aser iba ya “Linük ka, saru ka” tangatetba nung inyaker. GST kübok linük ajungalen tax ka dang aser jenjang kasa dang asütsü lateta lir, saka Nagaland nung shishilembartemi sorkar saru aika agütsüba ajanga timtem ajurur, ta parnokisa metetdaktsü.
GST mapa tenzükba ajanga linük nung tax saruba gate tem shibangogo saka Dimapur nungbo DMC-i sorkar nungi temelaba agir Dimapur telungi bener aruba atema “item tax” meshiba ya maaksü mapa ka lir. State sorkari shishilembartem mashioktsütettsü aser onoki onok temeten meteta lir. Nagaland nung GST kübok mapa inyaker asünung Nagaland sorkari SGST nungi anguba sen DMC den lemsateptsüla. Shishilembartemi DMC nem tax anaben GST aser Item tax mesarudaktsütsü, ta DCCI-i metetdaktsü.
DMC-i lease system tenzükba aser item shia tax meshiba ya magizüker aser iba ya auyazükba mapa ka dang lir. Anungji state sorkar aser MAD-i anogo 10 tsüngda GST inyakyim anentsü mesüra DMC-i item tax meshiba anentsü atema telemtetba agitsü mapang latettsür.
Mapang latettsüba nung sorkari mapa kecha meinyakra DCCI-i dokantem shibangtsüsa akümtsü aser sorkari onok nem telangzüba tajung magütsü tashi shishilembaren anena atatsüsa akümtsü, ta DCCI-i ashi.
DCCI-isa shishilembartem dang benjung mapang public yaritsü atema nikongtsütsü tesü tashi aser Deobartem nung dokantem lapoktsü atema mepishia metetdaktsü.