Dimapur takok ngua mokdangogo; PAC-i teyariteper ajak dang pelar

Hombarnü kaketshirtem tatidang agütsüba sülen school kima gari atatepa noktaktepa abelenlen angur. Achijilen Dimapur jila yimdong azüngazünga aliba angur. (Dimapur, December 10) 

Dimapur, (Luchii) December 10 (TYO): Benjung mapang Nagaland kübok tesem balala nungi nisungtem Dimapur-i shishilembai aruba mapang ka nung tanü Public Action Committee (PAC)-i ghonda 12 Dimapur mokdangba ajanga tetsükdaktsü ajuru.
Dimapur nung tax talitabong saruba, syndicate system, tashiyim agi sen meshiba aser sen yong nisung apuba inyakyim anema Naga Council Dimapur (NCD) kübok PAC-i iba sentong ayongzük, ta PAC, Media cell-i metetdaktsü.
Tanü bank, shisaliok rejutem aser sorkar office ajak shibang. Ajisüaka, tatidang agütsüba kaketshirtembo talenbangba kübok maitdaktsü.
Mokdangba sentong tiptema agiogo. Iba sentong ajanga tetsükdaktsü ajurudaktsüba atema sasa bilemer aser tarutsü nunga public-i iba amai yariteptsü imla atar, ta Convenor Vekhosayi Nyekha-i ashi.
Iba mokdangba sentong ya yimten tsütsü mesüra kija kar ajangzüktsü atema ayongba masü saka public-i talitabong tax saruba, tashiyim agi sen meshiba aser sen yong nisung apuba inyakyimtem agi laktetogo ta osang sangoktsütsü atema liasü, ta PAC Convenor-isa ashi.
Tribal Hoho 19 aser sendaktepa aliba telok ajaki mokdangba sentong tiptema agitettsüsa yaritepba atema kanga pelar, ta PAC-isa ashi.
Parnokisa temeimertem, kin hoho lennirtem, volunteers, teloktem aser arogotemi nübo, rongsen aser sarasadem agi yaritepba atema pelaba metetdaktsü.
PAC-isa Dimapur nung Police aser Administration-i yaritepba atema aser Dimapur nung alirtemi mokdangba posema nungitba atema pelaba metetdaktsü.
District administration aser police-i train aser tayimtsü ajanga senzüba tourist aser senzüsenbongertem asoshi security maparen inyak.