Dimapur tayimtsü anendak tzü atsüngdener

Dimapur, September 30 (Agencies): September 22-23, 2017 anogotem North East Connectivity Summit alidang Nagaland kübok Mokokchung aser Mon district tem nung tayimtsü anendak yanglutsü onüktem benoka jembi saka Dimapur airport indangbo balaka süoki ia mejembi.
Dimapur-i aruba pilot temi mapang shia tzünglu arudang Dimapur runaway nung tzü atsüngdenba ajanga timtem ajuruba aser iba ajanga parnoki Precision Approach Path Indicator (PAPI) mangur ta shiyonga arur.
Aiben pilot tem dang tzü atsüngdena aliba runaway nung anenzüktsü mesüra idak nungjagi tayimtsü apusoa aotsü atema tetuyuba agütsür aser ibaji passenger den pilot tem asoshi lendong lir.
Hokolbarnü Kolkata nungi Dimapur-i aruba Indigo tayimtsü nung passenger temi ashiba agi pilot temi Dimapur runaway nung tzü atsüngdena aliba atema ashi.
Dimapur Airport nung runaway tesadang ka tzü agi mobanga liaka kodaser Airport Director-i tayimtsü anentsü temelaba agütsü ta nisung aikati bilemer. Airport runaway nung tzü atsüngdena lira, tayimtsü manendaktsütsü kechiyong iba nung lendong ajurutsü melamelar ta passenger temi ashi.
Nagaland state nung tayimtsü anendakji Dimapur airport ya dang lir aser kodangsa tzünglu arudir runaway nung tzü atsüngdener, ta parnokisa shisem.