Dimapur Traffic Police-i metetdaktsür

Dimapur, January 13 (TYO) : January 9, 2017 nungi Old Dhansiri apu yanglushitsü atema shibanga lir, anungji iba lenmang nung gari mesenzütsü, ta Dimapur Traffic Police-i sangdong ka nung nenshia metetdaktsüogo.
Traffic tiptema senzütsü atema Lorna School lenjem adena Walford nungi Dhansiri apuleni senzüba nokdanger. Ajisüaka, Lorna School lenjem nungi Walford len senzütsü melar, ta Addl. Dy. Commissioner of Police/PRO, Dimapur sangdong nung shia lir.
Maneni Purana Bazar nungi Tragopan point lenmangtem nung gari mesemi senzüba ajanga tesenzürtemi Nagarjan aser 3rd Mile sendaktepba lenmanglen senzütsü ayongzüker, ta sangdong nungsa metetdaktsü.
Dimapur Police-isa two wheelers nung tesülen amenertema helmet asemtsü atema metetdaktsüogo aser aibelenertem merenshitsü ta parnokisa shisem.
Dimapur kübok lenmang balala yanglushiba ajanga traffic nung timtem balala ajurur aser traffic khuret ajema kümdaktsütsü atema Dimapur Traffic Police-i akokba tashi mapa inyakdar. Anungji, gari anirtemi Traffic Police tashi angaa Traffic Rules akhümtsübutsü mepishir aser lenmang tila nung ‘single lane driving’ asütsü metetdaktsür, ta Addl. Dy. Commissioner of Police/PRO sangdong nungsa ashi.