Dimapur Tzürangkong Senso Telongjemi Tsüngremmong ayonga among

Dimapur, Luroi/Aug 1 (TYO): Tanü Lengrijan Council hall, Dimapur nung Dimapur Tzürangkong Senso Telongjem (DTST)-i Tsüngremmong sentong ka ayongzüka kanga meraketa mongogo.
Tang mezüng DTST-i Dimapur nung Tsüngremmong sentong ayongzüka amonger; iba ya tetenzüker ser ano tarutsü nunga Telongjemi item ama sentong ayonga amongtsü, ta Mendenpurtemi metetdaktsü.
Iba sentong nung jembidang MLA, Wb. Moatoshi-i, “Asen Aoeri ajaklen telongjem indang jembir, aser longjema alitsü atema dang jembir, kechiyong asenok longjema mali. Telongjemji ni aser na nungi tenzüktsüla,” ta lokti ayongzük.
Tesasaba olen ka nung pai, “Asenoki senotsü aatetba dang nungibo timba achir. Anungji asenoki chidiyungdi azüoktsüla aser senotsü kanga meyaka amshitsüla, ibaji ajanga dang asenok kaa itta alitsü aser rongsenkettsüng jenjang tajungba akumtsü,” ta ayongzük.
Kasa sentong nung DTST Kimen, I. Panger Imchen-i tayongzükba o jembi aser Wb. S. Alem Pongen-i ‘Tsüngremmong Ratet’ tejangja metetdakja liasü.
Sentong tenzüka Rev. Tongpang Imchen-i sarasadem; Tsüngremmong ken DTST Sanen Luden puri aten; Dimapur Tzürangkong Watsü Telongjemia Tsüngremmong Ken aten aser Wt. Medemkala-i Osangtajung ken tajung ka aten.
Tatemsa Convenor, M. Toshi Pongen-i tepela anküp o jembi, aser Rev. Walu Walling-i tenüngsang agüja sarasademba sülen Tsüngremmong chiyung chiyunga sentong tembang.