Dimapur Watsü Telongjemi mokokmeinertem yari

Dimapur, April 24 (TYO): Dimapur nung alir Aor kibongtem rongnung kanga mokokmeiner kibong kar shimteta yashi Honibar nü Dimapur Watsü Telongjemi parnok kibongtem tonga oa kibong shia jang seret 50 agüja sarasadem agiba sentong tajung ka agiogo.
Watsü Mungdangi küm shia April ita nung anogo ka shiteta Watsü telen tenteta alidak tesem ajak nung sentong balala ayongzüka amonger aser taküm 2016 küm ya watsütem asoshi timtemer aser mokokmeinertem tonga oagi yariba küm ka liasü.
Iba anogomong sentong ya Dimapur nung Dimapur Watsü Telongjemi “Ketla Tongjem” omen nung ajemdaker agiogo.
Iba sentong temer, DWT lenirtemi iba osangzülur den jembidang ashiba agi, Dimapur nung Aor kibong aika chiyongtsü aser abensüoshi peria maka timtemer sensaker kibong aika lir. “Onoki jang ishikaji bener oa agütsüdang item kibong nung tsüraburtem tenük nungi nüktzü alua agizük. Asüngnep sorutsü makaba kibongtema liasü. Item kibongtem nung jagi tanurtem school-i yoktsü makoker, parnok kidangji tamendak mendena peria maka aser soruchioktsü chipo aonpoa peria maka. Item kibongtem asoshi asenok ajak tebilemtsü tulu lir,” ta Watsü lenirtemi Aortem kibong tia indang metetdaktsü.
Item ama kibongtem ano tonga oagi maneni yariteptsü DWT tebilemba lir.