Dimapur yimdong nung chiyungtsü agütsürtem nem metetdaktsür

Dimapur, March 30 (TYO): COVID-19 ajanga Nagaland ajunga shibanga aliba mapang aayangertem, tangalen nungi arurtem, nüngdakbapurtem aser police nem chiyungtsü agütsürtemi taochi mapa inyakdang sorkari nisung o nisung tsüngda tepila ayutsü latettsüba ama meinyaker, ta Dimapur Deputy Commissioner-i tanü metetdaktsü.
Sorkari teinyaktsütem lateta aliba ama aser jila ajunga nung nüngdakbapur ajak ayimjemtsü atema iba mapa tajung inyakba telok/NGOs-i District Administration den yaritepa dang inyaksangshitsü metetdaktsür, ta DC Anoop Khinchi, IAS-i ashi.
Chiyungtsü aser tanga mapa tajung inyakba NGOs ajaki Extra Assistant Commissioner (Dev) mobile No, 7005968695, Deputy Commissioner Office, Dimapur den tongtepa iba mapa inyaktsü mepishir, ta paisa ashi.