Dimapur:Khekaho-i tang teinyakdak project tem semdang

Dimapur, April 10, 2017 : Hombarnü Parliamentary secretray for youth resources & sports, Khekaho Assumi-i Dimapur nung tang teinyakdak aliba projects tem semdanga aoba noksa nung angur.

Dimapur, April 10 (TYO) : Tanü Hombarnü Parliamentary Secretary for Youth Resources & Sports, Khekaho Assumi-i State Stadium, Dimapur, tesem balala nung tetsür aser tebur atema hostel tem aser sorkari PPP inyakyim kübok Nagaland Youth Gymnastic Club den sentepr Swimming Pool yangluba tesemtem semdanga jajaogo, ta iba osangbeneri ashi.
Parliamentary Secretary-i pa arutsü osang agüjaka State Stadium yanglusang contractor tongtisang maruba atema mepelai ashi.
Aji oda süaka iba project nung engineer kati tang teinyakdak mapa rasaa ashiba den iba project shilem pungusü lemsar inyakba ashi aser tang sen crore 134.99 alangba shilem tanabuba (Phase-II) inyakba ashi. Iba asoshi SPA project kübok sen srore 63 bo agütsüogo.
Pai, project shilem 2buba nung joko shilem 68 bo tembanga inyakogo, ta pai shisem.
Khekaho-i ano sorkari PPP inyakyim kübok Nagaland Youth Gymnastic Club den senteper IMC Hall anasa tang teyangludak aliba Swimming Pool-a semdang saka sen crore 2.1 project nungi sen crore 1.99 tashi agüjaka mapa nunger maoba agüdang pai temulung masüba ashi.
Pai, tang anünga aliba sen ishi jagi anünga aliba mapaji metemtettsü amai pai arendaka bilemer, ta ashi.
Iba swimming pool yanglurtemi iba mapaji ita 3 tsüngda nung renemtsü ta ashi aser mapa atema tangutsü aliba senji Department-i memunui agütsütsü metetdaktsüogo.
Parliamentary Secretary, Khekaho-i Stadium Complex nung aliba State Sports Boy’s Hostel-a semdang aser iba ki tia ngua kanga mepela.
Pai, kechiba hostel tasenbaji mamshi odang toktsür, ta asüngdanga liasü.
Iba sülen pai Nagarjan nung aliba tetsürtem indang hostel semdang.