Diphu Police-i Lahorijan nung yi apu

Chiteni/July 11, 2020 (Agencies): Honibarnü, Diphu police-i Lahorijan tesem mita aoba mapang, ozüng agi nokdangba/memelaba yi jenti ngutet. Arunachal Pradesh nungi bener aruba tenokdangba yi carton 125 shi Mangilal Godown nung meima yur aliba Diphu police-i nguteta liasü.
Iba ama maparen dak sendakba nung, Arunachal Pradesh nungi AS-05K-1865 number aketba Alto gari ka nung tenokdangba yitem shibelenba Police-i pua liasü. Gari anisang ya Vijay Kr Yadav ta jangjaogo aser pa den gari ya Khatkhati check Gate nung apu.
Police-i pua alisang (Vijay) dang asüngdangya mapang, pai ashiba agi, Gologhat nungi item yi belentsü atema Alto, Swift, Safari aser Bolero Pick-up densema gari 20 tashi amshia liasü. Iba maparen nung densema alir nisung tenüng kar pai police dang metetdaktsü. Pai tenüng agütsürtemji Kamaljit Singh, Akilesh Yadav, Paths aser Nanu ta jangjaogo.
Maneni, July 10, 2020 nü Dillai nung ozüng alema inyakba maparen police-i pua liasü. Iba mapang ozüng alema shibelener nisung asem apu aser parnok ket nungi Marijuana (Ganja) tuozük seret 65 shi ngutet. Pua alir nisung asem ya Geeta Devi, Muni Mahato aser Anita Roy ta jangjaogo.
Tang, ozüng alema inyaker ajak ya NDPS 21/20 U/S 20(C)29 kübok police-i pua lir aser iba maparen dak sendakba nung maneni bushisüngdangtsü atema pua alir ajak ya Diphu Court ajanga obendang agütsütsü, ta S.I Chitra Ranjan Borah aser OC Ranjit Hazarika nati metetdaktsü.