Diphupar Naga Youth Organisation Golden Jubilee among

Dimapur, October 20 (TYO): Hokolbarnü Diphupar village ground nung Diphupar Naga Youth Organisation (DNYO) küm 50 ajungba Golden Jubilee benjungmong mongogo, aser mezüng anogo nung benjung kibur, MLA, Jacob Zhimomi-i, tanü terenlok atema tsükchir tamajungtibaji ‘ism’ lir aser iba ya asen loktiliba telungi aitdakja asenok ajak takoksa angur, ta metetdaktsü.
Jacob-i, “Jubilee mapang ya taoba mapang meyipa reprangshitsü aser tarutsü nung terenlok atema inyaktsü mapang lir. Asenok terenlok alitsüla aser rongsenkettsüng tsütsülena renloktsüla. Asenok tsüngda ‘ism’ lira terenlok malitsü,” ta metetdaktsü.
Paisa adenshia alibapurtem dang, “Asen tetsü-tebou nungi lanu putu tashi belentepa benshia aruba yimyatsüya tajungtem asenoki mamatoktsüla,” ta ayongzük.
“Tanü putu nung asenok libaliro ya kanga temaba jenjang ka nung lir. Asenoki mapa meinyakner saka kanga takar ama liner, ajisüaka rongsenkettsüng jenjang ajanga asenok dang ibaji memelar. Tanga terenlok aliba linüktem nung ama masü, saka asenokibo sorkar nem magütsüner, saka Central sorkar teyari kija nung dang imlar,” ta paisa ashi.
Lanurtem danga pai, sorkar mapa dang mebushitsüla, kechiyong saisapong, kentenmenü aser painting ama lenla aika nung mapa maongka jenti lir, ta ashi.
“Diphupar village ya telongjem aliba maitsü ka lir, aser state nung kanga tejakleni aoba tesem ka lir. Iba tesem nung Naga nunger kin balala ajak tesünep aser telongjem nung külemi liteter, aser iba yim ajanga tatishitsü tajung sayubaji tangaria angazüktsü ta imlar,” ta paisa shisem.
Iba anogomong nung benjung kiburi Diphupar village nung nüngdakbapurtem medical teyari mapang shidak nung agitettsü atema ambulance gari ka tenla agütsü.
Kasa sentong nung Head GB, Diphupar village, Kekhwetsu Khutsoh aser Rev. Candid Sareo natia o tatsütsü jembia liasü.
Sentong nungsa Diphupar Sumi Youth Organisation, Angami Youth Organisation, Diphupar aser Jubilee choir-ia shilem agi.
Lok Sabha, MP Neiphiu Rio-i Golden Jubilee nüngshilong sayatsütsü.