Diphupar nung Alcoholic Anonymous sentong agiogo

Dimapur, Metsüremi/March 02, 2021 (TYO): Deobar (28.02.2021) nikongdang 3:00 ako meta AO Baptist Church Diphupar nung Alcoholic Anonymous (AA) mezüng telongjem sentong agiogo. Iba sentong ya “To bring innovation to the Life Transformation programs within the Church” omen nung ajemdaker agia liasü.
Alcoholic Anonymous (AA) mezüng telongjem sentong nung AO Baptist Church Padumphukuri, Diphupar B Ao Baptist Church, Unity Ao Baptist Church aser Ao Baptist Church Diphupar nungi AA züngsemtem denogo; aser sentong nung L. Yanger Imsong President AA Diphupar aser Secretary Imkonglemba Longkumer na menden liasü.
Ao Baptist Church Diphupar nungi Deacon kati iba sentong tenzüka sarasadem aser pai sentong nung adenertem pelashishia agizük.
Arogo balala nungi AA züngsemtem iba sentong nung denogo, kong züngsemtemi Life transformation Camp nung madendang aser iba camp nung dener sülen parnok taküm nung ajangshibatem kuli agütsü.
AA züngsem kati Life Transformation Camp nung dener sülen nungi pa taküm melenshiba aser küm asem tashi pai temesepba chiyongtsü/yi mekongshii aruba; aser pai temesepba chiyongtsü achiajem masüba ajanga küm asem tsüngda pai ali kimung tilaka aliteta, ki tilaka yanglua aser gari ka alia par kibong den pelashishia aliba kuli agütsü.
Iba sentong nung shilem agir Arogo balala nungi sannüker temi agüja aliba omen nung ajemdaker jembiogo aser Arogo nung Alcoholic Anonymous sentong agiba indang tajangzüktemji:
1. Iba sentong ajanga yi ajemertem maitsü jangjashitsür aser loktii parnok agizükba metetdaktsür.
2. Yi ajemertem tanela jenjang tajungba yanglutsü asoshi ajungmesor.
3. Yi ajemertemi pei taküm jenjang angatettsü aser kümdanga alitsü asoshi yarir.
4. Lokti den tesendaktep tajung alitsü asoshi parnok ajungmesor
5. Timtema alidang aser yi endoker lia tanaben bena arua ajemba mapang yi jemertem kati ka yariteptsü atema AA ya sabang ka lir.
6. Yi ajemertem iba temesepba chiyongtsü mamshii taküm tajungba melenshir alitsü asoshi yarir.
Maneni, NEAN indang Chief Functionary ajanga tajungshi o jembi aser Ao Baptist Church Diphupar, Advisor AA-i tepela anküp o jembi. Iba sentong nung AA züngsem 100 den North East Artist Network (NEAN) indang staff tem denogo.
Sentong temer sülen Mission Board Ao Baptist Church Diphupar-i wawa menü ayongzüba den külemi sentong nung adener ajak chiyongdaktsü. Taruba Alcoholic Anonymous sentong ya AO Baptist Church Padumphukuri nung agitsü, ta sangdong ka ajanga metetdaktsü.