Diphupar nung Aoertemi Moatsü benjungmung kanga meraketa mungogo

Dimapur, May 02 (TYO): Tanü May 02, 2017 nü Diphupar nung aliba Aoertem tanur-tain ajak sobaliba sobutsü kanga meraketa sobur Diphupar local ground nung adenshia Moatsü benjung kanga longsoa mungogo.
Iba benjungmung ya Ao Senso Telongjem Diphupar (ASTD)-i “Envisioning today’s cultural values for tomorrow” (Asüng nukla nung tanü sobaliba jenjang) omen nung ayongzüka among.
Iba sentong nung tetushi tejaoker rongnung Urban Development Advisor, SI Jamir aser Commissioner of Police, Dimapur, Limasunep Jamir (IPS) na densema liasü.
Sentong nung jembidang SI Jamir-i lokti dang, talisa lanurtem dang, asen sobaliba aser yimyatsüyatem wazüka ayutsüla aser ajungkettsütsüla, ta ajungshia liasü.
Ano Commissioner of Police, Limasunep Jamir-ia, Aoeri Moatsü benjungmung ya lokti nung azükaru aser yimchiyimjung nükjidong yur amunger, ta metetdaktsü.
“Anüng kübok ajak atema mapang ka lir aser mapa ajak atema tsüngkem ka lir. Taküm küm tetenzüklen Diphupar nung tejashi aser tesama liasü, saka tanübo iba ya benjungtepba mapang ka lir. Tsüngrem den tesünep yanglutsü miim oji, Tsüngremer mapang tetemsü agizüktettsüla aser iba nungji pelatsüla ta asenoki Laishiba nungi angateter,” ta paisa metetdaktsü.
Police ketdangser ka ama, yimjung aser telongjem atema inyaktsü ayongzüker aser amalitepa inyakba ajanga asenoki district tejakleni bener aotsü, ta paisa ashi.
“Atangji iba ya temoatsüba anogo ka lir, kong adianu temeimtep, taitoktep aser ka küma longjemba tanela nung Moatsü benjungtsü atema asenok ajak longjemogo,” ta paisa shisem.
Kasa sentong nung N Tsuknung Jamir-i Moatsü teratet lemsatep aser Diphupar Village Council Chairman, Lanutoshi Pongen-ia o tatsüka jembia liasü.
Iba sentong nungsa Ao Senso Telongjem Diphupar Tir-i lokti pelaa agizüka liasü.
Diphupar Watsu Telongjem, Diphupar Aor Obalatem, Ao Kaketshir Telongjem Diphupar aser Ao Youth Front Diphupar teloktemia shilem balala agia liasü.