Diphupar nung Open Penalty Shootout kaogo

Dimapur, Metsüremi/March 22 (TYO): Diphupar village local ground nung March 21, 2019 Brehostibarnü Barefoot Welfare Society, Diphupar-i “Strong to the Finish” ta asüba omen nung ajemdaker One Day Open Penalty Shootout Tournament takok ngua agiogo.
Iba asayamung lapokba sentong nung BWS, General Secretary, S. Bendang Imsong menden liasü. Tsüngremer temoatsü meshizüka Asso. Pastor (Music Ministry) ABCD, Enyar Jamir-i sarasademtsü, BWS President, Rejosanen-i o jembi aser Akokla Langu-i ken ka tenloktsü.
Sentong nung tetushi tajokerji District Agriculture Officer, Peren, Hewoto Sema liasü. Heweto-i jembiba mapang, Dr. T. Ao mezüng Indian Olympic football team captain, shibai tsüngsem mesemi tetsüng pasa football asaya, ibaa den atishia asayamung ayonger Barefoot Welfare Society indang jembi.
Pai ashiba agi, saisapong ajanga nübur tsüngda ka ama bilemba, tesendaktep tajung, telongjem aser tesünep ajangzükdaktsür.
Asaya ka nung shilem agiba, takok anguba mesüra tamakok angubaji dang masü saka nai asaya koba tashi ka nung shilem agitetter, nai koda ochishia asayar aser sporting spirit nung asaytsüji kanga nüngdaker ta Heweto-isa shisem.
Koba asaya ka nung südir süang asenoki khen temulung agüja aser nendaka shilem agira asenoki iba dak sendakba yimya, tasa aser sempet tem mela mela angazüker, ta pai ashi.
Open Penalty Shootout semi-final atema Diphupar Village Council, Chairman Ghuzui Shohe match patron liasü. Final asaya nung Atila Longkumer, Diphupar tetushi tejaoker ama aruagi denogo aser lai takok angur nem sempet agüja liasü.
Iba asayamung nung United Boys-i takok ngua parnok nem senpet sen 50,000 agütsü. Maneni, Ao Students Union Diphupar-i Runner Up ngua senpet sen 20,000 agizük aser Imti, Ao Students Union Diphupar, nem Golden Glove award den külemi senpet sen 2000 agüja liasü.