DIPR-i Khrismas jeli sentong ayongzüka amung

IPR Additional Director, Limawati Ao-i Khristmas jeli sentong nung o jembiba angur.

Dimapur, December 15 (TYO) : December 14, 2015 nü Directorate of Information & Public Relations-i Khristmas jeli sentong ka ayongzüka agi.
Iba sentong nung IPR Director, Pausui Zeliang-i tesenteper ajak den Khristmas salem metetdaktsü aser pai ashiba agi, küm piyong meranga inyaka arur benjung tsüngküm nung külemi yamai amungba ya kanga jangratemtsüka lir.
Department nung ketdangsertem aser staff-i iba sentong tajung ayongzükba atema pelar, ta Director-isa ashi.
Sentong nung Additional Director, Limawati Ao-ia Khristmas osang abendang, ketdangsertem aser staff-i yimya balaka nung Khristmas amungtsü ayongzük.
DIPR nung mapa inyakertemi tangutsü kecha meimlai nübortem ajangzükdaktsütsü asoshi aser mapa tembanga inyaktsü atema talila awaloka oa inyaktsüla, ta Limawati-i ayongzük.
Paisa, tesentepertem dang pei mapa nung bendanga agüja aser nendaka inyaktsü aser sorkar mapa inyaker tajung ka asütsü nenshia metetdaktsü.
Director lenisüba kübok Khristmas jeli sentong ayongzüka agitetba atema Additional Director, Limawati-isa Director dang pelaba metetdaktsü.
Iba sentong nung Inter-Section carol competition ka liasü aser iba nung News Section-i mezüngbuba jenjang, Establishment-1-i tanabuba aser Technical Section-i tasembuba jenjang takoktem ngua liasü.
Sentong nung mendenji Joint Director, Tokishe Sema liasü, APRO, Nongozo Rikh-i lai zünga sarasadem aser Keneizetuonuo, Imchadila o Temjenkaba nungeri ken ajanga shilem agi.