Director General Assam Rifles-i Nagaland semdang

Dimapur, May 10 (TYO): Director General Assam Rifles AVSM, YSM, SM, VSM, Lt Gen Shokin Chauhan-i anogo ananü atema Kohima nung amungdang Nagaland Chief Minister, Dr. Shurhozelie Liezietsu den ajurutepa senden ka amen.
May 8, 2017 nü Director General Assam Rifles aser Nagaland Chief Minister tsüngda senden amendang Nagaland dak sendakba security onüktem lemsatep aser iba mapang Lt Gen Shokin-i Dr. Shurhozelie dang ‘Friends of the Hill people’ omen ama Assam Rifles-i inyaktsü ta nangzük, ta Lt Col Amitabh Sharma, PRO HQ IGAR (N)-i Bodbarnü sangdong ka nung metetdaktsü.
Lt Gen Shokin ji Assam Rifles U-19 Oorja CAPF Talent Hunt Football asayamung tembangba sentong nung adentsü atema aruba liasü. Iba asayamung ya Prime Minister-i linük nung football asaya ajungkettsü atema MSN XI Million maparen kübok ayongzüka asaya, ta PRO HQ IGAR (N) sangdong nungsa shia lir.
Director General-isa Assam Rifles ketdangser aser sepaitem den ajurutepa sensaksema liasü aser idangji pai bendanga agütsür mapa inyaktsü ayongzük, ta Lt Col Amitabh-isa metetdaktsü.