Director tejen kar den film yanglubatem sasa bilemer: Naseeruddin Shah

Mumbai, January 27 (Agencies): Lokti nung tebilemtsü balala dak sendakba nung ajemdaker yangluba film Irada nung Naseeruddin Shah tongti shilem agitsü. Film, ken aser sentong balala ajanga nisüngtemi lokti nung tebilemtsü balalatem nung ajemdaker tasüngdangba agütsütsü meranger, ta pai ashi.
“Lokti nem tasüngdangba ka agütsütsübaji film aser item mesükba sentong balalatem nükjidong lir. Iba film ya Punjab nung tzü tajemtsü mejongi miim densema akümba dak ajemdaker yangluba film ka lir. Iba ya kanga dang tongtibang tebilemtsüka lir, aser film ajanga onoki iba ya sayuner,” ta Naseeruddin-i ashi.
Irada film ya director Aparna Singh indang mezüngbuba film lir. Iba film nung Naseeruddin ex-Army ka ama adoker. Pa jala südaktsüba asoshi mangyangba film ka lir. Maneni iba film nung Arshad Warsi police ketdangser ka ama shilem agir.
Film director tasen den inyakbaji pa asoshi kecha tebilemtsü maliasü, ta pai shisem.
“Ni kü film tesadang kabo director tasen den inyakogo, aser kodanga parnok den inyakdang temulung masüba mali, saka director- tejen tem den yangluba film kar asoshi ni sasaa bilemer. Director tasentem dak tejangraba balaka lir. Parnoki parnok mapa nung takok anguba alima dang sayuner, anungji kanga meranga inyaker. Director kar atemabo parnok mezüng film ajak rongnung tajungtiba asür,” ta pai maneni shisem.
Maneni iba film nung Divya Dutta, Sagarika Ghatge aser Sharad Kelkar nungera shilem agir. Irada film February 17 nü sayatsü.