‘Dirtiest’ town nung züngsemba atema Dibrugarh Ward Commissioner ka mapa nungi anen

Guwajati, October 4 (Agencies): Northeast India nung yimti memerüktibatem nung Dibrugarh densemba sülen Dibrugarh Municipal Board (DMB) ward commissioner Rachana Jain-i la mapa nungi anenogo.
Jain ya No. 11 ward asoshi commissioner liasü aser lai Dibrugarh deputy commissioner Pallav Gopal Jha nem shidiji agütsü.
Swachh Survekshan 2019 results nung Dibrugarh ya yimti 425 nungi jenjang 415 nung liasü.
“Asenoki Mahatma Gandhi indang ‘Clean India’ asangsang nung atalokdaktsütsü atema inyaker, saka Dibrugarh reprangdangra kanga majung lir. Tesem ajaklen jana lir. Ni nübortem atema inyaker saka ni nübortemi aginüba ama meinyaktet nung, kü menden toktsür” ta Jain-i osangbener dang ashi.
“Iba ya onok atema maaksü ka lir kechiyong Dibrugarh ya Chief Minister Sarbananda Sonowal asoba jila lir aser ozü MP ya union cabinet minister lir” ta laisa ashi.
India nung dirtiest city/town ta ser yimti 425 asadangba nung Assam kübok Silchar ya jenjang tasembuba nung lir. Northeast nung dirtiest city/town rongnung Dibrugarh tanabuba jenjang nung ta bushitet.
Swachh Survekshan 2019 ajanga India nung yimti temerüktibaji Indore, iba sülen Ambikapur aser tasembubaji Mysore ta bushitetogo.
Northeast state yimtibatem rongnung temerüktibaji Sikkim yimtiba Gangtok lir. Iba sülen tanabubaji Guwahati, Assam, tasembubaji Imphal, Manipur aser pezübubaji Itanagar, Arunachal Pradesh lir.
Iba asadangba nungsa Nagaland yimtiba Kohima jenjang pungububa, Tripura yimtiba Agartala trokbuba, Meghalaya yimtiba Shillong tenetbuba aser Mizoram yimtiba Aizawl tibuba ta bushitetba osang metetdaktsüogo.
Swachh Survekshan ya India nung kümshia cleanliness, hygiene aser sanitation asadangba maparen ka lir. Iba ya Swachh Bharat Abhiyan nung shilem ka ama tenzük.