Disaster management team-i East Siang semdang

Pasighat, Rongjui/September 6 (Agencies): Disaster Management Secretary Bidol Tayeng aser Director Kanto Danggen nati local MLA Lombo Tayeng den külemi Rasemnü Arunachal Pradesh, East Siang kübok Mebo Sub-Division nung tzümetsüng agi kongshir aliba yimtsüngtem semdangogo.
NDRF nungi ketdangser asem, Executive Engineer (WRD) T Jamoh, Deputy Director of Agriculture YJ Lego, in-charge Circle Officer (Namsing) B Yirang aser DDMO Genden Tsomu nungeri parnok meina liasü.
Par teloki Borguli, Seram, Namsing, Ralling aser Sigar yimtsüng nung ayongküm anenzüka orr aliba tem asadangogo.
Maneni parnoki iba yimtsüngtem nung alirtem den sensaksema liasü. Tzümetsüng agi ki raksatsüba tem yanglushitsü atema Disaster Management Department-i sen lakh 15 agütsütsü nangzük, koba parnok indang account nung inoktsütsü.
East Siang Deputy Commissioner Tamiyo Tatak dang ali anenzüka aoba ajanga alu aser tsünüsempongtsü raksatsüba tem asadangtsü asoshi tetuyuba agütsüogo. Item yimtsüngtem nung tzümetsüng ajanga nisung noklang aika indang alu raksatsüogo.
Kasa mapang nung Siang ayong nung tzü kanga sashia ayimba ajanga Partung asetkong nunger amal tesem karbo parnoki mesemdangtet.
Parnoki item yimtsüngtem aponger aotsü nungi kümzüktsü asoshi jenjang tapet agitsü asoshi tali süoki ia sensak asem. Item yimtsüngtem nung teraksatsüba tali adoktsü nungi nokdangtsü atema tongtibang tesem kar nung spurs yanglutsü asatetogo.
Tzü den külemi lishi ayimba ajanga ayong ayimba yimya melenshir aser iba ajanga Borguli, Seram, Namsing, Sigar, Raling aser tanga yimtsüngtem lendong nung toktsür.