Discipleship Bible College nung 35 buba Convocation agi

Rasemnü (Bodbar) Discipleship Bible College, Dimapur nung United Sangtam Baptist Church Executive Secretary, Rev. C. Lima Sangtam-i convocation onük jembidang agiba noksa angur.

Dimapur, Rongchii (April) 11 (TYO): Rasemnü (Bodbar) Discipleship Bible College, Dimapur nung 35 buba Convocation sentong agi.
Taküm Master of Divinity kaketshir 16 aser Bachelor of Theology kaketshir 36 tashi graduate asü aser iba mapang DBC Principal aser Assistant Dean nati takok angurtem nem sempet aser kulikakettem lema agütsü.
Sentong nung o jembirji Executive Secretary, United Sangtam Baptist Church, Rev. C. Lima Sangtam liasü aser pai C asem- ‘Calling, Contentment and Character’ nung ajemdaker jembi.
“Tsüngremer Ministry nung tenzüktsübaji temela masü saka asenok melulatsüla kechiyong iba ya Tsüngremi mulungba mapa ka lir. Asenoki Tsüngrem nem tenüngsang agütsüdi aser Pa teyari ajanga asenoki maneni nisung apurtem asütsü merangdi” ta Rev. C. Lima-i graduate asürtem ayongzüka jembi.
Tajaba nung ajemdaker jembidang paisa kaketshirtem dang tashiyim agi masü saka mulungsoa dang mapa inyaktsü ayongzük. “Tajaba ajanga mulungsoba adokdaktsür aser asenok pei pei tajaba ama mapa inyaktsüla. Asenok tajaba ama inyakra, iba jagi asenok kümkümshidaktsür aser pei atema masü saka Khrista ajangzüktsü atema inyaker aser iba jagi taküm nung tepela adokdaktsür” ta Rev. Lima-isa ashi.
Tepela ta kodang südir, ibaji Yisu, Tangartem aser Na lir. Laishirtemi mezüng Yisu, tanabuba nung Tangartem aser tasembuba nungang Na südaktsütsüla, ta paisa shisem.
“Tanü alima nung tenük sünga alitsübaji kanga tasak lir. Ajisüaka laishirtembo pei ket nung kechi ali aji agi tenük sünger alitsü asoshi merangtsüla” ta Rev. Lima-isa ayongzük. Iba asoshi pai Filipi 4:1-12 nung ajemdaker jembi.
Rev. Lima-isa yimyatsüya atema jembidang, iba ya nisung ka dak tangatetba aser tebilemba tajungtem aliba indang lir aser asenok taküm nung tangar atema aria bilema aser yimya tajungtem benshia alitsüla. Asenoki tangar tenzüktsüla aser Khristan ka taküm ta asübaji Yisu tenüng nung tangartem asoshi aria bilemja tenzüktsüba lir, ta paisa shisem.