Discipleship Care & Counseling Training Center ka lapok

Dimapur, January 30 (TYO) : Rev. Dr. I. Imkong Jamir lenisüba kübok World Aid Youth Mission (WAYM)-i acha-ayanga Discipleship Care & Counseling Training Center ka January 27, 2017 nü Rev. Dr. Noklu Lkr (Secretary Church & Mission ABAM, Impur) ajanga Mokokchung nung lapoktsüogo.
Tesem lapoktsür Noklu Lkr-i küm 10 nung Naga lima nungi temesepba yi samadaktsütsü ta nükjidong yur amangbapurtemi meranga inyaka aliba mapang WAYM ajanga iba ama Discipleship Care Center lapokba ajanga asenok tenangzükba nükjidong yakta ataloktsü tamang akar ta ashi.
Iba sentong nung DCCTC lapokba nükjidong WAYM Director ajanga lemsatepdang, temenen achiajemba nungi pilatsü mulungtetbapur tem, temenen nungi pila shirnoki Khrista sülen anidakner, ano Tsüngrem tenzüktsü nangzükba nübur asoshi Tsüngrem O rajemnürtem itemla nüburtem asoshi Tsüngrem O ajanga tanüla nung tangatetba agütsüba tesem asütsü asoshi lapoker, ta pai metetdaktsü.
Iba Institution nungsa Counseling Training-a agütsütsü ta paisa shisem.
DCCTC lapokba sülen mezüng achiajemertem kija asoshi Revival sentong ka ‘Taküm meyiba reprangshiba’ omen nung ajemdaker January 28, 2017 nung akadang parnok achiajemertem 35 densema liasü.
Achi ajemertem kija asoshi Revival akabaji asen Naga lima nung iba ya mezüng asütsü südi ta tadenertemi lemsatepa liasü.
Revival nung adenertem parnok kanga dang temoatsü anguba den taküm nung dang temelenshi masü saka tanüla jenjang dena ajangzüktetta temoatsü anguba parnok rongnung kuli sütepa liasü.
Iba Revival nung O jembir ji Rev. Dr. I. Imkong Jamir aser Rikum Lkr den counselor 6 liasü. Kari iba Center teyari aginüa lira 0-7085420399 ajanga tongteprateptsü akok.