Discipleship College tetsürtem hostel tenzüker

DBC girls hostel ki yanglutsü tenzükba temaitsü DBC Governing Board nung mendenbuba Er.Obang Longchari-i koterang agi ali mechipokba noksa nung angur. (Dimapur, Nov. 14)

Dimapur, November 14 (TYO) : Nagaland nung küm 40 jakdang asentenshi tulu adoka nübortem aika Tsüngrem taochi agi kümzükba tamaitsü Dimapur nung International Evangelistic Felolowship (IEF) teloki lapokba Discipleship Bible College (DBC) nung tetsürtem atema hostel ki ka yanglutsü atema Mongolbar anepdang sarasadem mapang ka agia tenzükogo.
Iba hostel ki ya sen crore ka ser lakh neter shi agi renemtsü aser ground floor nungi 2nd floor tashi atutsüsa sentong yanglua lir.
Iba ki yanglutsü asoshi ali ona tenzükba sentong nung jembidang, iba mapa ya nisung tsüngdangbo tulu aser sen maka saka Tsüngrem dak dang amanga tenzüker ta DBC principal Rev.O.Alemi metetdaktsü.
Iba ki yangluba maparen nung arogo aser kija kibongi Kibuba mapa nung tenzükertem adokdaktsütsü tangatetba aser tejangraba nung kari longru, kari cement, kari lisem aser kari yin tenla aser ano karibo pei tsürabur tenüng nung takdang ka ana jenjang tenla agütsüra, iba jagi mapa tulu ya tila küma melamelaa renenemtettsü aser ano teburtem hostel dena yakta yanglutettsü ta DBC Development Council nung convenor Dr.Sünep Imcheni metetdaktsü.
Tanep Mongolbar anepdang DBC tetsürtem hostel ki yanglutsü tenzükba temaitsü DBC Governing Board nung mendenbuba Er.Obang Longchari-i koterang agi ali mechipok aser telok ajaki sarasadema iba sentong tembang.
Tang DBC nung azünger ajak agi tetsür 127 aser tebur 114 lir.
DBC ya Dimapur district kübok Signal Angami yimtsüng nung lir aser iba college amenoka aliba tenem dang ya Mount Miracle ta ajar. Iba College ya NBCC-i recognize asüba college ka lir. Iba college nung agiba M.Div; B.Th aser Diploma in Theology course ajak ya Asia Theological Association (ATA) nung agizüka lir.
Tang iba college nung Nagaland nungi dang masü saka Nepal tashi nungi arua züngdagi.
Iba ki yanglutsü atema yaküm 2016 küm ABAM kübok aliba arogotem ajak nung temulung tenla khen saruogo aser ano maneni arogotemi sarasadem nung yaritepdaktsüner ta DBC principal-isa mepishia metetdaktsü.