District 7 nung mokdangba malitsü

Kohima, Aenjeti 31 (TYO): Nagaland nung kin hohotemi election masü Naga yimten latettsüla ta yimyim ayimoktsüba nung Naga nunger lemsaogo.
Angami Public Organisaiton (APO)-i Kohima district nung aser Eastern Nagaland Public Organisation (ENPO)-i Mon, Tuensang, Kiphire aser Longleng district tem nung nung mokdangba malitsü atema telemtetba agiogo.
Core Committee of Nagaland Tribal Hohos and Civil Organisations (CCNTHCO)-i Tsüklai 1, 2018 nü state ajunga nung ghonda 12 mokdangtsü ayongzüka lir.
Tanü APO aser parnok kübok tongti telok 9 külem rongdak senden ka amendang iba telemtetba agi, ta APO tatong tir K T Vilie-i osangbener dang ashi.
Angami nunger litsü nung mokdang malitsü aser ibaji Kohima nung dang masü saka Dimapur district kübok Chumukedima dena lir.
State sorkari tetsür nem shilem 33 lemzükja ULBs election agitsü lemtetba anema yaküm Aenjeti 31 nü nübortemi sorkar anema apuso aser idangji lanur ana taküm sama aser sorkar sorkar meyong kiojentem aika raksa aser ozüng alema mapa inyak, ta Vilie-isa metetdaktsü.
Iba mapang ULB election onükji state sorkar kübok liasü saka tangbo election indang maparen ajungaji Centre sorkar kübok lir. Asenoki election magidaktsütsü atema tekong meranga noktakra aser mokdangba sentongtem ayonga agia aser tejangrar candidate tem sota ayutsü merangra tensa mejungi akümtsü tsübua bilemer, ta paisa shisem.
“APO-i nisung shinga nomination asüba menoktangtsü aser taruba general election 2018 memokdangtsü” ta APO tir Dr Kepelhousie Terhuja-i sangdong ka nung metetdaktsü.
“Tsüklai 1 nü Angami nunger litsü nung mokdangba sentong kecha magidaktsütsü aser public-ia mokdangba sentong nung shilem magitsü tetuyuba agütsür. Iba yimyim ya Naga nunger ajungtsü atema ayimoktsür” ta APO sangdong nungsa shia lir.
Ano külen, ENPO züngsem David Thingchem-i osangbener dang ashiba agi, tanü Dimapur nung senden amendang ENPO district pezü nung mokdangba sentong ayonga magitsü lemtet.
Ajisüaka, paisa nomination asüba atema “ENPO-i political party ajak dang Aenjeti 29 nü Kohima nung külem sangdong ka agütsüba ama election maparen nung shilem magitsü mepishir” ta ashi.
Kohima district kübok Tseminyu sub-division nung Rengma Hoho-ia kasa telemtetba agi.
Wokha district nungia Lotha Hoho chairman Mhao Humtsoe-i ashiba agi, parnoki asüng mokdangba sentong nung shilem magitsü aser election dak sendakba maparen nung tebang maitsü.
Phek district kübok Chakhesang Public Organisation (CPO)-i tanü Pfutsero nung senden ka amen aser idangji asüng anogoji ‘Day of Prayer for early solution of Naga political issue’ asütsü telemtetba agi.
“Iba anogo nung Chakhesang nunger litsü nung public mesüra garitem mesenzütsü aser Chakhesang senso ajaki sarasadem anogo amungtsü tetuyuba agütsür” ta CPO tongti tezülur Mutsivoyi Kotso-i ashi.