District ajak nung COVID -19 hospital lapoktsü

Dimapur, April 7 (TYO): Nagaland nung district hospital ajak COVID-19 hospital kümdaktsütsü. Ajisüaka, iba mapa inyakba ajanga OPD-i general emergency atema arurtem atema tebilemtsü abener, ta Health & Family Welfare Principal Secretary, Menukhol John-i ashi.
Department-i COVID-19 hospital ajak dang COVID agi shiranger meputet tashi OPD mapa maneni inyaktsü atema shiogo. COVID aketer putetra, districts hospital tem nung anepalurtem anasatiba health unit-i belena anir aotsü, ta paisa metetdaktsü.
Nagaland-i aruba transporters aser carriers dak sendakba atema paisa ashiba agi ‘parnok ajak screening asür aser anogoshia senzüsenbongba mita anüker.’
H&FW Principal Director-i district ajaka sema senzüogo aser iba mapang COVID -19 dak sendakba maparen inyakba osang metetpelaogo aser district hospital ajak COVID-19 hospital kümdaktsütsü atema mapa ajunga tatemleni arudar, ta John-isa shisem.
Külen, Principal Secretary, Abhijit Sinha, IAS-i sangdong ka ajanga April 7, 2020 nü Nagaland nung Law & Order aser nüngdakba Goods & Services dak sendakba osang metetdaktsü.
District ajak nung jangotsü ayokba dokantem lapok. Mokokchung nung dokan lapoktsü tetuyuba agüja inyaker aser Kiphire nung anogo lemsar lapokdaktsür. State kübok tesem ajak nung jangotsü, mamatzü aser mozütem peria dang aliba osang angazükogo, ta Principal Secretary-isa ashi.
Dimapur nung tongtipang nüngdakbatem abenba garitem nem permit agütsür aser dokantem anepdang 9:00 ako nungi nikongtsütsü 2:00 ako tashi lapoker.
Dimapur nungsa wholesale market anepdang 3:00 nungi 8:00 ako tashi lapoker aser District Administration-i community kitchen ka lapoka lir aser NGO temi yaritepa chiyungtsü alemer, ta Abhijit-isa metetdaktsü.
Wokha nung tangalen nungi aayangi arur nisung 547 nem jangotsü teyari agütsüogo, ta paisa shisem.