District ajak nung National Lok Adalat agitsü

Dimapur, Rongchii/April 9 (TYO): Nagaland State Legal Services Authority (NSLSA) tawabangba kübok National Lok Adalat (People’s Courts) district headquarters ajak nung April 10 nü agitsü. Iba ya 2020-2021 atema 1buba Quarterly Lok Adalat asütsü.
District court telung nung Lok Adalat Benches 11, District Legal Services Authority (DLSAs)-i amenoktsü.
Lok Adalat ya ken o bentettsü atema lenmang tanga ka lir, kong okadak ken o bangadak alibatem aser pre-litigation stage nung aliba ken o tem bentettsür. Lok Adalats nem Legal Services Authorities Act, 1987 kübok statutory status agütsüogo.
Iba Act kübok Lok Adalat temi telemtetba agiba ya civil court ka indang obendang ama agitsü, koba ken o nung sendaka aliba teloktem ajaki anidaktsüla aser telemtetbatem ya okdak mebenokshitettsü, ta shia lir.
Lok Adalat nung ken o benokba atema taa kecha magir. Okadak bangdaka aliba ken o ka Lok Adalat nung bentettsü atema tuyua ken o bentetra okadak taa agütsür aliba dena meyipa agütsütsü. DLSA nung bentetba ken o tem ajak State Authority indang web portal nslsa.nagalandgov.in nung upload asütsü.