District awareness camp ka Jalukie nung aka

Dimapur, Metsüremi/March 17 (TYO): Department of Social Welfare, Peren-i achaayanga Jalukie Town Hall nung March 15 nü adolescent tem atema district awareness camp ka katsüogo.
Onük nung ajemdaker jembidang, DPO, Rural Child Health & Universal Immunization Program (RCH&UIP), Peren Dr. M. Nukshisangla Jamir-i ashiba agi, healthy nisung ka ta asüba tetezüji pa dak tashidak kecha maliba kija dang ajar masü saka temang tekolok aser shisatsü ajak liromedema anema aliba dang ajar.
Adolescent ka ama anema alitsü asoshi tongtibang tenüngdakba kaji merekmejua alitsü nüngdaker kechiyong iba mapang nung parnok temang nung temelenshi aika adoker aser parnok aiben manemi alir. Anema alitsü atema nisung kati anogo nung tzü marok 7 nungi 8 tashi ajemtsüla ta laisa ashi.
Kibong akümtsü atema tetemsü küm indang jembidang lai ashiba agi, kibong akümtsü atema küm 28 nung 32 tashiji tetemsü lir, kechiyong tetsürtem tanur bena asotsü atema küm 15 nungi 45 tashi dang lir.
Lokti nung tebilemtsü tem; balalulaba, kidang mepetmesü, tetsür tashiyim agi raksatsüba, low birth weight, infant immortality rate amala ya anojungi kibong akümba ajanga tali akümer, ta Jamir-isa ashi.
Kasa mapang nung Tening, CDPO, Yanbeni Humtsoe-i Adolescent tetsürtem atema kaket; “Handbook for awareness on health, nutrition, right age of marriage, social issues & legal rights for adolescent girls” indang tongmelang agi rasaa ashi.
Iba sentong ya Jalukie, CDPO Namhuheing lenisüba kübok aka aser Anganwadi Workers Igützeule-i sarasademer tenzük.
Sentong nungsa tetsür anati ken aten. Maneni iba sentong nung adolescent tetsür parnok 259 dena liasü.
Ahthibung, CDPO Khuppao Henga-i tepela anküp o jembi aser iba sülen sentong nung adenertem tetsürtem nem Sanitary napkins aser kaket agüja liasü, ta ketdangser sangdong ka ajanga metetdaktsü.