District Court-i TR Zeliang tazüngba ken o angadanger

Dimapur, December 1 (Agencies) : Nagaland Chief Minister, TR Zeliang indang tazüngba kuli nung ashishitep adokba onük nung ajemdaker District Court Kohima nung Judicial Magistrate First Class, Tuccuno Vamuzo-i Hombarnü kuli agütsürtem Okadaki jaoka kulitem bendenogo.
November 30, 2015 nü North East Hills’ University (NEHU) nung Registrar aser Kohima College nung Head Assistant nati Okadak kulikakettem agütsü aser iba nung TR Zeliang-i BA Examinations nung tamakok anguba shia lir.
NEHU nung Acting Registrar-i agütsüba NEHU indang record nung ashiba agi, Taditui R Zeliang-i Roll no. 598 amer 1979 küm BA examination agütsü saka pai tamakok angu asütsü akok ta zülua lir.
“1979 küm TR Zeliang ta ser nisung shinga takok anguba züluoka mali” ta NEHU-i okadak agütsüba kulikaket nung shia lir.
NEHU aser Kohima College indang record tem nung ashiba agi, TR Zeliang-i BA exam nung tamakok anguba dang masü saka 1979 küm subject ajak nung tamakok anguba zülua lir aser ano 1980 nunga pai subject pezü nung tamakok angu, ta okadak nungi nisung kati ashi. Ajisüaka, paisa ashiba agi iba ya preliminary hearing ka dang lir aser tai tonglokja aliria pa indang kulitem agütsütsü.
Iba ken o benoker atema Advocate, KN Balgopal-i ashiba agi, tai tonglokja aliba nisungji Okadaki arutsüla.
“Okadak-i temeten agütsüba inyakyim kübok tai tonglokja alir jaoktsüla” ta Balgopal-isa shisem.
Ajisüaka, Court-i tai tonglokja alir jaokba indang tetuyuba kecha magütsüi lir.
Ano, November 30 nüsa iba ken o atema kuliser ka, District Congress Committee, Peren District, President-ia Okadak pa indang kuli agütsüogo.
Pai ashiba agi, iba osang ya pai mezüng pai July 2015 nung angazük aser ibaji NTC ajanga RTI application agütsüba indang osang liasü.
Kasa onük atema August 7, 2015 nü RTI ka agütsü aser iba indang telangzübaji August 12, 2015 nü angu. RTI telangzüba nung Roll no. 598-i 1980 nung Kohima College nungi BA tatidang agütsü saka English, Alt. English, Economics aser History nung tamakok anguba shia lir, ta Peren District DCCI President-isa Okadaki ashi.
Advocate-i DCCI Tir dang pai bangdak ketdangser kar den iba ken o benoka ali asü mali ta asüngdangdang, pai Election Commission dangi iba onük atema shidi ka züluogo ta langzü.
TR Zeliang-i pa indang nomination papers nung pa 1980 küm Kohima College nungi BA examination nung takok angu ta shia lir. Chief Minister kaji State ketdangsübaren nung Tekolakba lir anungji paji ochishir ka asütsüla. Pai tezüluba nung tai züluba ajanga Naga nunger tsüngdang tangatetba tamajung sayuogo, ta DCCI Tir-isa shisem.
Advocate KN Balgopal-i ashiba agi, iba ken o nung tangatetba tsütsü aser ozüng tsütsü aibelenba jungkai adoka sayur.
“2013 Nagaland Assembly elections nung kuli tiyazü agütsü aser ibaji official record aser kulitem ajanga aitsür. Anungji tang tai tonglokja aliri ola adoktsüla. Pai pa indang kulitem agütsütsüla,” ta Balgopal-isa shisem.
Iba ken o nung Section 125 (A) of the Representation of People Act 1951 kübok TR Zeliang aija ken o angadangtsü akok. Iba nung pai aitsüra, pa ita trok tepuokdak ayutsü akok mesüra senchi achitsü akok mesüra temerenshi anaprong angutsü akok.
Iba ken o ya Judicial Magistrate ket nung lir aser yashi iba ken o angadangba mapang Chief Minister tenüng nung Joshua Sheqi dena liasü.