District Disaster Management Authority senden menogo

Dimapur, Aami/June 19 (TYO): District Disaster Management Authority (DDMA) Dimapur 2buba quarterly senden June 18 nü DC conference hall Dimapur nung DC aser DDMA Dimapur mendenbuba, Kevekha Kevin Zehol lenisüba kübok kaogo.
Iba senden ya Dimapur nung tzünglurwa atema renemshia aliba indang asadangshitsü atema amen aser monsoon mock drill akatsü benok.
Lendong balala kecha mesangdongi ataloker ta shia DC Dimapur-i department ajak dang nüburtem ajangzükdaktsütsü atema renemshia alitsü ashi. Paisa 1buba Mock drill agiba dak kangabo temulung masü ta shia line departments ajak dang jungdak maparen balala atema renemshia alitsü ajungshi.
District Disaster Management officer Dimapur, Rendemo Lotha-i, Arunachal nungi 12 battalion National Disaster Response Force Company ka tang Central Training Institute nung arua aliba metetdaktsü. Parnok yakta tzü nung arakseta alir tem Kodak kümzüktsü iba dak sendakba nung mock drill agitsü.
Senden nungsa power department audit agitsü nüngdakba lemsatep kechiyong lendong atalokba mapang power department dak kanga mejungi kongshir kong tekümzükba asoshi power line tama disconnect asütsüla. Senden nung adenertemisa offices, colleges, schools, business establishments, cinema halls amala nung fire extinguishers amenoktsü nüngdakba lemsatepba den item ya mashitsü sayutsü nüngdakba benoka jembi.
Fire & emergency service nungi ketdangsertemi ki meter 15 nungi tema ajungketa yanglur aliba tem nung emergency exit atema stairway 2 (tabelen aser tachichi) bosa alitsüla ta ashi. Parnokisa Dimapur district atema hydraulic apu nüngdakba lemsatep.
Senden tatemsa mendenbubai tepela o jembi aser senden nung sensaksemba onük ajak mapa küma inyakyonga aotsü pai tenangzükba agütsü, ta DPRO Dimapur sangdong ka ajanga metetdaktsü.