District Hospital Mon atema ambulance ana semzükogo

Dimapur, Metsüremi/March 12 (TYO): Advisor, Social Welfare, Wangpang Konuak-i March 11, 2025 nü District Hospital Mon nem Advanced Life Support (ALS) ambulances ana amokja liasü.

Iba nüngtem nung sentong ka agidang Advisor Wangpang-i iba mapa asoshi NHPC Ltd. nem tenüngsang agütsü aser item ambulance yagi district nung shirangertem nem teyari tulu agütsütsü ta ashi.

Mon indang healthcare system tajungba kumdaktsüba nung lenmang sayuba aser yariba atema pai Deputy Commissioner, Mon, Ajit Kumar Verma aser Minister, Health & Family Welfare, P. Paiwang Konyak nem tenüngsang agüja liasü.

Pela agizükba o jembidang Corporate Social Responsibility (CSR) kübok ambulance agütsüba aoshi M.S, District Hospital Mon, Dr. Aman Konyak-i NHPC Ltd. dang pelaba lemsatepa liasü.

Paisa healthcare sector nung Deputy Commissioner, Mon ajanga CSR teyari maneni bener aruba atema tenüngsang agüja liasü.

Chief Medical Officer, Mon ajanga melepzüng o jembidang, stakeholders temi yaritepba atema pelaba ashi aser Mon nung healthcare facilities tashi aittsü asoshi maneni lungjemer inyaktsü imlaba lemsatepa liasü.

Iba sentong nung BPM Mon Block, Pongchai Konyak menden liasü.

Taoba hopta NHPC Ltd nungi CSR teyari kübok Mon district nem ALS ambulance ana aser tasümang abenba gari ana agüja liasü.

Deputy Commissioner Mon, Ajit Kumar Verma-ia NHPC Ltd. dang pelaba lemsatep aser par administration-i healthcare ki o jen tajungba kumdaktsütsü asoshi inyaker, ta ashi.

Pai medical department dang mozüki nung osettsüset nüngdakba osang agütsütsü ayongzüka liasü.