District tasen ka khanga Darlawn nung rally ayongzük aka

Aizwal, Rongchii 18 (Agencies): Darlawn ya district ka kümdaktsütsü asoshi khanga Aizawl nung km 114 shi pilar aliba Darlawn jila nung Darlawn District Demand Committee lenisüba kübok nisung aikati Sangtennü rally ka nung shilem agiogo.
Darlawn ya Aizawl district kübok lir.
Iba rally nung nisung 3000 shi-i shilem agiogo, kong kidanger yimtsüng nungi nüburtemia shilem agia liasü.
Rally nung shilem agiba nüburtemi district tasen ka kümtettsüba atema yimyim ayima yimtong süa senzü, aser parnoki tanga district tem den parnok lokteper toktsüba dak temulung masüba lemsatepa liasü.
Darlawn District Demand Committee secretary Lalhmangaizual-i ashiba agi, Darlawn district tasen ka kümtettsü asoshi akhangba kübok ya yimtsüng 41 lir.
“Onok tanga district tem den lokteper meliner saka iba tesem nung terenlok bener arutsüba atema district tasen ka kümteta yimden yimsüsüba balaka aginer,” ta pai ashi.
Rally nung shilem agirtemi Darlawn district tasen ka kümtettsüba ya yimden yimsüsüba tsütsü aser administrative tsütsü kanga tongtibang lir, kechiyong iba tesem ya tanga tesem dang nungi tatsüngzükba lir, ta shia District tasen ka kümtettsüba atema ajanga ajanga akhangtsü pangzünga ayu. Parnokisa ashiba agi, Darlawn district tasen ka kümtettsüba atema akhangba nung densema aliba tesemtem nung security tajungba nüngdaker kechiyong iba tesem ya Mizoram, Manipur aser Assam arrtsü nung lir.
Longkaka aitertemisa state sorkar dang election code of conduct mebenok tsüngda parnok takhangba ajak ataloktsütsü asoshi shiogo.
Darlawn district balaka akhangba ya 1998 küm nungi tenzük, ta district demand committee lenirtemi ashi.
Darlawn district tasen ka akhangba kübok yimtsüng 41, nütsüngyongsük 40,000 aser Aizawl district kübok Tuival, Chalfilh aser Serlui assembly constituency nung kibong 8,000 dak tema lir.
MNF sorkar mapang 2008 küm state sorkari Saitual district den Hnathial aser Khawzawl district kümtettsüba atema sangdonga liasü. Ajisüaka tang tashi nung item districts tasentem mapa küma inyak metenzük.