District Task Force, Mokokchung ajanga metetdaktsür

Dimapur, Metsüremi/March 16 (TYO): Novel coronavirus (COVID-19) tashidak wara nungi jenbua alitsü asoshi District Task Force for COVID-19 Mokokchung ajanga nüburtem nem tekümdangtsü aser teinyaktsü kar metetdaktsüogo.
Order NO.DEV-79118-L9128O Dated Mokokchung the 13th of March, 2020 nung shia aliba ama, tanga state nungi district-i aruba passenger tem nem district police temi Tsutapela gate aser Watiyongpang gate nung self declaration form kaka agütsütsü. Anungji nübur ajunga kümzüka alitsü mechi passenger ajaki iba inyakyim nung amaliteptsü mepeshir, ta sangdong nung shia lir.
District Task Force for COVID-19 Mokokchung ajanga district nung tsünglanglen agüja aliba Health Centres (Community Health Centres (CHCs) aser Primary health Centres (pHCs)) tem ya District COVID-19 monitoring Centre sangdongogo.
Nisung shirnoksa iba tashidak agi kongshia aliba tesem nungi district-i meyipa shilanger, parnok ajaki pei sasa sangdonga anasa aliba District COVID-19 monitoring Centre tem nung osang agütsütsüla. Maneni item mera agiba mapang nüburtem metsübuteptsü asoshia ajungshiogo.