District tsüngda tetoktepba akatsüla: Modi

New Delhi nung April 21, 2016 nü 10buba Civil Services Day sentong nung Ato kilonser, Narendra Modi-i ‘Implementation of Priority Programmes’ atema Excellence Award agütsüba noksa nung angur. Kasa noksa nung Minister of State for Development of North Eastern Region (I/C), Prime Minister’s Office, Personnel, Public Grievances & Pensions, Department of Atomic Energy, Department of Space, Dr. Jitendra Singh-a angur.

New Delhi, April 21 (Agencies): District ketdangsertem tsüngda tajung nung tetoktepba ajanga temelenshi tajung adoktsü, ta tanü New Delhi nung Ato kilonser, Narendra Modi-i metetdaktsü.

10 buba Civil Services Day awards sentong nung jembidang Modi-i, “Linük nung district ketdangsertemi pei mapa inyakba nung tetoktepba akatsüla,” ta ashi.

Pei district tesülen atsüngzüka lira, aser parnok mapa tajung majitetra parnoki parnok sasa, iba ya kechi ajanga (?) ta tasüngdangba akatsüla, ta Ato kilonserisa ashi.

Pai ashiba agi, district ketdangsertemi nüburtem tamang koktettsü atema merangtsüla.

“Ketdangser ka aser tazüoker asüba kijaji teperi masü. Ajaki pei sasep nung temelenshi adokdaktsür kaka asütsüla. Ajaki tajung inyaktsü atema asenoki tensa ka yanglutsüla. India nunger nisung crore 125-i linük tejakleni anitsü,” ta paisa ashi.

Ajaki tetsükdaktsü shiaji maongka tajung ama agitsüla, ta paisa shisem.