Divine Connection pur kenten sentong takok nung agiogo

Brehostibarnü Luyong yimdak public ground nung Luyong Valley Festival nung shilem ka ama Divine Connection puri kentenba sentong nung shilem agiba noksa nung angur.

Luyong (Mokokchung), December 21 (TYO): Luyong Students’ Union-i ayongzükba Luyong Valley Festival 2017 Brihostibar anepdang 10:00 ako nung SDO , Tuli, L Samuel Konyak-i Public Ground nung lapoktsütsüa asayayonga arudar. Iba festival nung beach volleyball, tug of war, master chef, marathon race, arm wrestling aser solo tetoktepba nung shilem agir 150-i asaya balala nung toktepa arudar.
Benjungmung nung shilem ka ama Nagaland nung nüngtugu kentenba telok Divine Connection puri shilem tajung agiogo.
Divine Connection puri nüngtugu kentenbaba telok Guns & Roses, Queen nungeri atenba nüngtugu ken tem atenba den nüngtugu Hinid ken kar aser parnok indang ken kar tena liasü. Iba sentong asoshi sabang ya Tuli Lenden Baptist Church Youth Department-i yanglu, aser parnokisa Divine Connection puri shilem magi tsüngda shilem tajung agia liasü. Arenla Lemtur lenisüba kübok iba kentenba sentong kanga takok ngua agiogo. Kentenba sentong nung adenertemia kentenertem den anidaka ken tem atenba nung shilem agia iba sentong jangratema agiogo.
Kentenba sentong metenzük tsüngda tongti tesemdanger Retired Principal District & Session Judge, Mayang Lima-i iba amala sentong tajung ayongzüba atema, aser Tuli area nung aliba lanurtem parnok sempet tejungtem sayatsü aser arangtetshitsü nükjidong nung iba sentong ayongzükba atema Luyong Students’ Union tenüng sanga liasü. Tongti tesemdanger maneni tarutsü nung Luyong valley nungi khuret angatetba senso tajung, lenir aser kaketshisatsü bushiba ren nung mongintem aika adoktsü imlaba lemsatepa liasü.